Mbështetjet e rreme nga Duka dhe Dukesha e Sussex-it po përdoren në mediat sociale për të promovuar skemat e investimeve të lidhura me Bitcoin. Fotot dhe intervistat false me Princin Harry dhe Meghan dhe personazhe të tjerë të famshëm po përdoren për të tërhequr investitorë. Autoriteti i Sjelljes Financiare tha se po rriten shqetësimet për reklamat e mashtrimit.
Numri i konsumatorëve që raportojnë mashtrime të mundshme tek mbikëqyrësi është rritur me më shumë se 400% në pesë vjet. Në vitin 2021, kishte më shumë se 34,000 raportime nga konsumatorët me dyshime për oferta investimi të mundshme mashtruese, thotë Autoriteti i Sjelljes Financiare. Në vitin 2016 kishte qenë 8000 raporton “BBC”.
“Njerëzit duhet të jenë shumë të kujdesshëm kur shohin reklama investimi që ofrojnë kthime të larta, edhe nëse ato duket se mbështeten nga të famshëm,” tha një zëdhënëse e rregullatorit të shërbimeve financiare. Intervistat e sajuara me Princin Harry dhe Meghan janë përdorur më parë në pretendimet për investime dhe duket se ka përpjekje të reja për të përdorur emrat e tyre në artikujt në internet që premtojnë fitime të menjëhershme, të shpërndara në platformat e mediave sociale.
Artikujt në internet përmbajnë pretendime false për mbështetjen e figurave të tjera të pasura, duke përfshirë Bill Gates, Sir Richard Branson dhe Mark Zuckerberg. Artikujt e investimit të kontrolluara nga Autoriteti i Sjelljes Financiare, duket se janë të lidhura me një faqe interneti në Evropën Lindore. Përfaqësuesit e Dukës dhe Dukeshës së Sussex janë alarmuar.
Action Fraud, qendra kombëtare e raportimit për mashtrimin dhe krimin kibernetik, thotë se mashtruesit po përdorin mediat sociale për të synuar një grupmoshë më të re. / abcnews.al
