Bashkia e Beratit ka reaguar pasi kandidati i PD-së Tomor Alizoti së bashku me disa mbështetës denoncuan se bllokuan një furgon me ndihma ushqimore, duke akuzuar se PS po shpërndan ndihma për vota dhe se brenda ndodhej një zyrtare e degës lokale të së majtës në pushtet.
Bashkia mohon akuzat e PD-së se po shpërndanin ndihma natën për qytetarët duke deklaruar se thjesht po i zhvendosnin nga një ambient i bashkisë në magazinë.
“Bashkia Berat gjatë periudhës së pandemisë ka organizuar në ambientet e sallës së konferencave, mallra të ndryshëm për ndihmë ndaj familjeve të prekura nga pandemia.
Si rrjedhojë e kërkesës së strukturave të Bashkisë Berat për të organizuar aktivitete me grupet e interesit duke respektuar masat anti COVID, ka lindur nevoja e transferimit të bazës materiale nga salla e konferencave në magazinat e Drejtorisë Arsimore.
Strukturat e autorizuara kanë filluar zhvendosjen e këtyre materialeve në magazinat e përcaktuara.
Çdo tentative për të penguar funksionet e Bashkisë Berat tregon qartazi dëshpërimin e subjekteve politike të caktuara që kërkoj me çdo kusht të tensionojnë situatën dhe të njollosin qetësinë e zhvillimit të fushatës zgjedhore në qytetin e Beratit. Organet ligj-zbatuese duhen të ndjekin të gjitha hapat ligjore dhe ne garantojmë bashkëpunimin dhe transprencën maksimale në sqarimin e çdo akuze të motivuar nga verbëria politike” mbyllet deklarata./ db/ Abcnews.al
