Ish-presidenti i Perusë, Alberto Fujimori, i cili u dënua për shkelje të të drejtave të njeriut dhe korrupsion, ka vdekur në moshën 86-vjeçare. Vajza e tij Keiko Fujimori postoi në rrjetet sociale duke thënë se ish-presidenti kishte vdekur pas një beteje të gjatë me kancerin në gjuhë.
Fujimori qeverisi Perunë midis viteve 1990 dhe 2000 përpara se të detyrohej të largohej nga detyra mes akuzave për korrupsion. ëndrimi i tij i ashpër kundër një kryengritjeje guerile të krahut të majtë, kur ishte president, solli gjithashtu akuza për abuzime të të drejtave të njeriut.
Por mbështetësit e tij e lavdërojnë atë për mposhtjen e rebelëve në një kohë kur ata mund të merrnin pushtetin. Ai u largua nga vendi, por më pas u arrestua dhe u ekstradua, si dhe u dënua.
Ish-presidenti u dënua për një sërë rastesh, duke përfshirë korrupsionin, shpërdorimin e pushtetit dhe qëndrimin pas dy masakrave të skuadrës së vdekjes në fillim të viteve 1990.
Dhjetorin e kaluar, Fujimori u lirua nga burgu Barbadillo i Lima-s, pasi kishte vuajtur më shumë se 15 vjet dënim me 25 vjet burg. Gjykata Kushtetuese e Perusë riktheu faljen presidenciale të lëshuar 6 vjet më parë.
Për mbështetësit e Fujimorit, ai ishte njeriu që shpëtoi Perunë nga një grup brutal rebel maoist, Sendero Luminoso (Rruga e Shkëlqyer), dhe që e ktheu ekonominë në rrugën e duhur pas rritjes së inflacionit. Por për mijëra persona të prekur nga konflikti, Fujimori ishte një figurë autoritare dhe një udhëheqës brutal.
