Helmimi masiv në Krujë, 380 pacientë në spital për ndihmë mjekësore, banorët nisin të blejnë ujin

Një ditë pas helmimit masiv në Krujë, banorët kanë nisur të blejnë ujin për konsum, për shkak të dyshimeve se helmimi është shkaktuar nga uji i pijshëm.

Gazetarja Ajgena Korbi raporton për ABC se brenda 72 orëve pritet të dalë edhe përgjigja e analizave për ujin që kanë konsumuar banorët.

Deri më tani janë kryer të gjitha analizat në burime. I gjithë qyteti i Krujës furnizohet nga dy burime të cilat ndahen në 6 depo.

Dyshimet janë se uji mund të jetë kontaminuar gjatë rrugës pasi nga analizat e kryera në burim ka rezultuar se ai nuk ka qenë i ndotur me elementë që mund të ketë sjellë helmimin masiv.

Që prej ditës së djeshme në urgjencën e spitalit të Krujës dhe pediatrisë janë paraqitur për të marrë ndihmën e parë mjekësore 380 qytetarë.

Ditën e sotme ministrja e Shëndetësisë Ogerta Manastirliu si dhe deputetë të opozitës vizituan spitalin e Krujës duke ndjekur nga afër situatën. Manastirliu deklaroi në daljen për mediat se çdo gjë është nën kontroll dhe tashmë do të investigohet për shkakun e helmimit. m.v/Abcnews.al