Një sezon mjaft i mirë e bëri të vetën.
Rubin Hebaj nuk do ta vazhdojë karrierën në Uzbekistan, por tashmë në Arabinë Saudite.
Skuadra e tij e radhës është Al Orobah, që konkurron në Ligën e Parë saudite, një nivel më poshtë sesa Liga Profesioniste ku luajnë Cristiano Ronaldo e Neymar.
Sulmuesi shkodran pritej që të kishte një ndryshim pas një edicioni të veçantë në Superligën uzbeke, ku në fund u shpall edhe Lojtari më i Mirë.
Ai shënoi 12 gola për skuadrën e tij, Andizhan, duke qenë shënuesi i dytë më i mirë i kampionatit, pra duke fituar Këpucën e Argjendit, pas sulmuesit serb, Dragan Çeran, që arriti në 13 rrjeta.
Gjithsesi, Hebaj, u përzgjodh si më i miri i sezonit duke merituar Topin e Artë në Uzbekistan, trofe që iu dorëzua në ceremoninë e mbylljes së vitit.
Shkodrani 25-vjeçar botoi një mesazh në faqen zyrtare të klubit, ku falenderonte klubin, shokët e ekipit dhe tifozët, si dhe lajmëronte kalimin në Arabinë Saudite.
Siç edhe shkruan në mesazh, Hebaj synon që të ngjitet sa më shpejt në elitën e futbollit saudit.
Në karrierën e tij, sulmuesi ka luajtur për Vllazninë, Partizanin e Teutën në Shqipëri, për Shkëndinë e Tetovës, si dhe në Slloveni e Ukrainë./ h.ll/abcnews.al
