15 avokatët që thyen bojkotin e vendosur nga Dhoma e Avokatisë së Shqipërisë do ti nënshtrohen sot masave disiplinore, pasi sot rreth orës 14:30 do të mblidhet Komisioni i Disiplinës pranë Dhomë së Avokatisë.
Avokatët pritet të ndëshkohen me gjoba, pezullim licence dhe propozim për heqje licence.
Ndërkohë ditën e nesërme në orën 11:00 është paralajmëruar protesta e avokatëve para Këshillit të Lartë Gjyqësor për hartën e re gjyqësore.
Pak ditë më parë kryetari i Dhomës së Avokatisë Maksim Haxhia njoftoi se gjatë bojkotit të parë, disa avokatë kanë frekuentuar proceset gjyqësore dhe ndaj tyre në mbledhjen e radhës komisionin i disiplinës do të vendosë deri në heqjen e licencës masa.
Lexo edhe: Harta e re gjyqësore, Dhoma e Avokatisë vendos bojkot të përgjithshëm pa afat
Më 7 korrik dhoma e Avokatisë vendosi bojkot të përgjithshëm pa afat të seancave, ndërsa për masat e sigurimit ka vendosur bojkot 10 ditë.
Përjashtim nga bojkoti janë vetëm masat e sigurisë që do të caktohen ndaj të miturve.
Shkak i bojkotit është bërë harte e re gjyqësore që KLGJ i ka propozuar për miratim Ministrisë së Drejtësisë dhe asaj të financave për shkrirjen e 18 gjykatave në vend.
Harta e re gjyqësore parashikon në total 13 gjykata të shkallës së parë, 2 gjykatë administrative dhe shkrirjen e gjykatave të apelit në një të vetme. Avokatët i kërkojnë qeverisë të mos e miratojë këtë skemë.
/abcnew.al/
