Kryeministri izraelit, Benjamin Netanyahu tha të dielën se ishte ende e paqartë nëse një marrëveshje për pengjet do të dilte nga bisedimet, duke refuzuar të diskutonte detaje. Megjithatë, ai theksoi se Hamasi duhet të kthehet në arsye me kërkesat e tij, të cilat ai i përshkroi si absurde.
“Ata janë në një planet tjetër. Por nëse ata kthehen në arsye, atëherë po, do të kemi një marrëveshje për pengjet. Shpresoj që po”, tha ai. Zyrtari i lartë i Hamasit, Sami Abu Zohri, duke komentuar deklaratat e Netanyahut, tha se ato hedhin dyshime mbi gatishmërinë e Izraelit për të arritur një marrëveshje.
“Komentet e Netanyahut tregojnë se ai nuk është i interesuar për arritjen e një marrëveshjeje”, tha Abu Zuhri për Reuters, duke akuzuar udhëheqësin izraelit se dëshiron të “vazhdojë negociatat mes bombardimeve dhe gjakderdhjes (palestineze).
Negociatorët nga Izraeli, Katari, Egjipti dhe SHBA ranë dakord për “konturet themelore” të një marrëveshjeje gjatë bisedimeve të fundjavës në Paris, tha për CNN këshilltari për sigurinë kombëtare të Shtëpisë së Bardhë, Jake Sullivan , por detajet përfundimtare ende nuk janë përcaktuar.
Çfarë parashikon marrëveshja?
Mediat izraelite raportuan se marrëveshja do të lejonte lirimin e 30 ose 40 pengjeve në këmbim të deri në 300 të burgosur palestinezë dhe një armëpushim që zgjat deri në gjashtë javë. Të dyja palët pritet të vazhdojnë negociatat gjatë pauzës, si dhe një armëpushim të përhershëm, tha një zyrtar egjiptian për Associated Press.
Armëpushimi do të mbulojë muajin e shenjtë të Ramazanit , i cili fillon rreth 10 marsit të këtij viti, dhe marrëveshja do të përfshijë gjithashtu një rritje të ndihmës për Gazën. Pas bisedimeve fillestare në Paris, bisedimet do të pasojnë në Doha dhe Kajro, thanë burimet egjiptiane të sigurisë për Reuters./abcnews.al
