Hakerë të mbështetur nga shteti kinez kanë bërë objekt të sulmeve të tyre anëtarët e stafit që punojnë në fushatën elektorale të demokratit Joe Biden, tha të enjten një zyrtar i lartë i sigurisë në kompaninë Google. I njëjti zyrtar tha se hakera iranianë kishin shënjestruar së fundmi llogaritë e email-it që i përkisnin stafit të fushatës së Presidentit republikan Donald Trump, shkruan VOA.
Përpjekjet iraniane për të hyrë në postën elektronike të zyrtarëve të fushatës Trump janë dokumentuar edhe më parë.
Vitin e kaluar, kompania Microsoft njoftoi se një grup i njohur me nofkën “Charming Kitten” kishte provuar të futej në llogaritë e postës elektronike që i përkisnin një fushate presidenciale në Shtetet e Bashkuara. Megjithëse kompania nuk përmendi emrin e fushatës elektorale, burime të tjera e identifikuan atë si fushatën Trump, raporton abcnews.al
Në fillim të këtij viti, kompania Area 1 Security tha se hakerat rusë kishin sulmuar kompani të lidhura me një firmë gazi ukrainase, ku djali i zotit Biden dikur shërbente në bord.
Jo detaje të mëtejshme
Kompania Google nuk pranoi të ofrojë detaje të mëtejshme përtej mesazheve në Twitter të zotit Huntley, por njoftimi i pazakontë publik është një tregues se sa të prekshëm janë bërë amerikanët ndaj përpjekjeve të spiunazhit dixhital ndaj fushatave politike.
“U kemi dërguar përdoruesve që janë sulmuar paralajmërimin tonë për sulmin dhe i referuam këto informacione në organet federale të zbatimit të ligjit”, tha një përfaqësues i kompanisë Google.
Ndërhyrja në zgjedhje është bërë një shqetësim për qeveritë, veçanërisht pasi agjencitë amerikane të zbulimit ranë në përfundim se Rusia zhvilloi një operacion hakmarrjeje dhe propagande për të prishur procesin demokratik amerikan në vitin 2016 për të ndihmuar kandidatin e atëhershëm Trump që të bëhej president, raporton abcnews.al
Ndër objektivat e sulmit ishte edhe infrastruktura dixhitale e përdorur nga fushata e kandidates demokrate për presidente në vitin 2016, Hillary Clinton.
Moska ka mohuar çdo ndërhyrje.
Sulmet të zakonshme
Përpjekjet e kundërshtarëve të huaj për t’u ndërhyrë në fushatat presidenciale janë të zakonshme.
“Ne jemi në dijeni të raporteve nga Google se dikush ka bërë përpjekje të pasuksesshme për të hyrë në llogaritë personale të postës elektronike të stafit të fushatës”, tha një zëdhënës i fushatës Biden. “Ne e kemi ditur që nga fillimi i fushatës sonë se do t’i nënshtrohemi sulmeve të tilla dhe ne jemi të përgatitur për to”.
Fushata Trump, ambasada kineze në Uashington dhe misioni iranian në Kombet e Bashkuara në New York nuk iu përgjigjën menjëherë kërkesave për komente.
Charming Kitten, grupi i identifikuar nga Google si përgjegjës për shënjestrimin e fushatës Trump, gjithashtu ka qenë kohët e fundit në titujt e lajmeve mbi ndërhyrje të tjera, përfshirë shënjestrimin e kompanisë farmaceutike Gilead Sciences Inc, raporton abcnews.al
Në fillim të këtij viti, Reuters e lidhi grupin me përpjekjet për të imituar personalitete të mediave dhe gazetarë.
John Hultquist, drejtor i analizave të zbulimit me firmën amerikane të sigurisë kibernetike FireEye Inc, i përshkroi të dy grupet e hakerave si “aktorë spiunazhi” dhe tha se ata me shumë gjasa po përpiqeshin të mblidhnin të dhëna dhe jo thjesht të vidhnin materiale për t’i nxjerrë në internet.
FBI-ja nuk pranoi të komentoj. /abcnews.al
