Sekretari i Përgjithshëm i OKB-së, Antonio Guterres iu bëri thirrje palëve në Lindjen e Mesme që të parandalojnë përhapjen e konfliktit që ka shpërthyer mes Hamasit dhe Izraelit ditët e fundit.
“Jam i shqetësuar nga shkëmbimi i zjarrit rishtazi përgjatë Vijës Blu dhe sulmet që u njoftuan se u bënë nga Libani jugor. U bëj thirrje të gjitha palëve, dhe atyre që kanë influencë tek këto palë, të shmangin një përshkallëzim dhe shtrirje të mëtejshme”, theksoi Guterres në selinë qendrore të OKB-së.
Vija Blu është vija ndarëse mes Izraelit dhe Libanit, e cila patrullohet nga paqeruajtës të OKB-së. Grupi militant libanez Hezbollah, i mbështetur nga Irani, kontrollon Libanin jugor. Ekziston frika se ky grup do të bëhet pjesë e konfliktit, në mbështetje të Hamasit pasi në 2006, Izraeli dhe Hezbollahu bënë luftime 33-ditore në Liban.
Sekretari i përgjithshëm i OKB-së tha se mban kontakte të vazhdueshme me udhëheqësit në rajon për të parandaluar një përhapje të konfliktit./abcnews.al
