Grupi i Sazeve të Myzeqesë me në krye Tom Balin nga Ansambli Margarita Xhepa kanë qenë të ftuar pasditen e sotme në “Edicionin Veror”.
Ata përveç se kanë performuar, gjithashtu kanë ndarë edhe pak nga historia e krijimit të grupit.
“Presim aktivitetet tona që të fillojnë në muajin gusht. Pas një viti të vështirë që ishim totalisht të izoluar, shpresojmë që ky vit do të jetë i mbarë për ne.
Grupi i sazeve të Myzeqesë ka një eksperiencë të vjetër, kemi mbi 42 vjet që jemi krijuar, në vitin 1975. Grupi jonë i ka ndryshuar rrymave që ndryshuan mbas viteve ’90. Ne qendruam aty ku ishim, përmirësuam folklorin myzeqar dhe kemi pasur sukses”.
Sakaq, Grupi i Sazeve të Myzeqesë kanë shprehur shqetësimin se nuk kanë vëmendjen e institucioneve. Ata kanë theksuar se çdo kosto e përballojnë vetë.
“Kur shkojmë në Lushnje na thonë i përkisni Divjakës, shkojmë në Divjakë na thonë jeni me Lushnjen. Edhe kemi mbetur mes dy bashkive. Ne të gjitha këto i kemi mbuluar me shpenzimet tona. Vetëm festivali ndërkombëtar në Treviso na vlerësuan, udhëtimin dhe kur u kthyem. Kurse festivalitet e tjera kanë qenë me shpenzimet tona. Ne nuk kemi një ambjent që të mblidhemi, shkojmë në lokal, po aty ka kosto”. l.k/abcnews.al
