Mbi 25-vjeçarin Edis Rrapaj, i cili goditi me shkop për vdekjen babain e tij dje në Roskovec nuk rëndon ende asnjë akuzë.
Gazetarja Valbona Davidhi raporton se pritet që ekspertët të përcaktojnë gjendjen e shëndetit mendor të të riut që i mori jetën të atit. Prokuroria kërkon që të dokumentohet gjendja e shëndetit mendor dhe më pas të bëhet klasifikimi i akuzës.
Ngjarja e rëndë ndodhi ditën e djeshme në fshatin Luar të Roskovecit. Pas një konflikti mes tyre 25-vjeçari goditi me shkop të atin 52-vjeçar Dhori Rrapaj duke i shkaktuar vdekjen e menjëhershme.
Të vetmit që kanë folur për mediat kanë qenë të afërmit, të cilët kanë thënë se babë e bir vuanin nga shëndeti mendor ndërsa janë të shokuar nga ngjarja. Ata thanë gjithashtu se familja jetonte në kushte të vështira ekonomike dhe nuk kishin mundësi të merrnin kurë. Mungesa e ilaçeve sipas të afërmve rëndonte gjendjen e tyre.
Ndërkaq, grupi hetimor ka marrë në pyetje edhe djalin tjetër, i cili është adoleshent dhe pritet të hedhë më shumë dritë mbi ngjarjen. g.v/abcnews.al
