Michael Cohen, ish-avokati i Donald Trump, ka pranuar se vitet e kaluara shpesh ka gënjyer për të ndihmuar ish-presidentin amerikan dhe për të mbrojtur familjen e tij.
Në një seri pyetjesh, avokati mbrojtës i Trump, Todd Blanche, gjatë një seance në një gjykatë të New York-ut, u përpoq ta portretizonte Cohen si dikë që nuk mund t’i besohet, si dikë mashtrues dhe të dyshimtë.
Kjo pasi Cohen kujtoi gënjeshtrat që i ka thënë duke theksuar atë për ndërtimin e Kullës Trump në Moskë, gjë që nuk u realizua kurrë. Cohen tha se gënjeshtrat në atë kohë kishin për qëllim ta ndihmonin Trumpin.
Kur Blanche e pyet Cohen se nëse e dinte që po gënjente, ai përgjigjet shkurt: “Po”. Në një tjetër rast, ai thotë se ka gënjyer një gjykatës federal në një gjyq ku akuzohej gruaja e tij, Laura. Gjithashtu, ai tregon se ka gënjyer edhe hetues të ndryshëm në mënyrë që të mos hetonin veprimet e tij dhe të Trumpit, shkruan VOA.
Cohen është dëshmitari i 19-të dhe i fundit kundër Trump. Ai thuhet të jetë pjesërisht i motivuar nga hakmarrja pasi Trump nuk e emëroi atë në një pozicion më të lartë kur e mori përsipër presidencën.
Bëhet e ditur se gjatë seancës Blanche ka luajtur edhe një video ku Cohen feston padinë e Trump dhe dëgjohet duke thënë se shpreson që ai të burgoset. Siç raportohet, avokati aktual po përpiqet ta nënvlerësojë dëshminë e Cohen se ish-presidenti ka ofruar një pagesë prej 130 mijë dollarëve për aktoren e filmave për të rritur, Stormy Daniles.
Ish-avokati thuhet se shpesh regjistronte telefonata të fshehta, pa u treguar njerëzve. Në përgjithësi, Cohen e pranoi që në telefonin e tij gjenden 95 telefonata të regjistruara fshehurazi.
Duke akuzuar drejtpërdrejt Cohen për gënjeshtra, Blanche i tha: “Mund ta pranoni”.
“Jo zotëri, nuk mundem”, iu kundërpërgjigj Cohen.
Ndërkohë, gjyqi pritet të fillojë pas disa ditësh, pas diplomimit të djalit të Trump në Florida. Nëse ish-presidenti amerikan shpallet fajtor, ai mund të dënohet deri në katër vjet burg/abcnews.al
