Ministrja e Jashtme gjermane, Annalena Baerbock paralajmëroi të hënën se një “përshkallëzim i mëtejshëm” i konfliktit të Izraelit me Libanin do të shkaktonte “katastrofë” për të gjithë Lindjen e Mesme.
Duke shkuar në një takim të ministrave të jashtëm të Bashkimit Evropian në Luksemburg, Baerbock e quajti situatën përgjatë kufirit verior të Izraelit me Libanin “më shumë se shqetësuese”.
“Një përshkallëzim i mëtejshëm do të ishte një katastrofë për të gjithë në rajon, prandaj është kaq e rëndësishme që më në fund të arrijmë një armëpushim në Gaza,” u tha Baerbock gazetarëve.
Ka pasur një rritje të mprehtë në sulmet ndërkufitare nga forcat izraelite dhe Hezbollahu, grupi militant i mbështetur nga Irani. Evakuimet janë bërë në disa vendbanime veriore të Izraelit dhe fshatra libaneze.
Kryeministri izraelit Benjamin Netanyahu tha në një intervistë të dielën se faza intensive e luftës me Hamasin në Gaza është gati të përfundojë, gjë që nxiti shqetësimin se ushtria izraelite mund ta kthejë fokusin e saj drejt veriut.
Baerbock tha se do të udhëtojë në Izrael dhe Liban këtë javë. Ajo do të mbajë një fjalim në Konferencën e Sigurisë Herzliya në Izrael, tha të premten një zëdhënës i ministrisë së jashtme gjermane. Më pas ajo do të takohet me homologun e saj izraelit, Israel Katz në Jerusalem dhe kryeministrin e Autoritetit Palestinez, Mohammed Mustafa, në Ramallah, në Bregun Perëndimor të pushtuar.
Baerbock më pas do të udhëtojë për në Liban për t’u takuar me kryeministrin libanez Najib Mikati./abcnews.al
