Gjermania ka nevojë për deri në 260,000 ushtarë aktivë

 Gjermania do të ketë nevojë për 260,000 ushtarë aktivë për të përmbushur kërkesat në rritje të mbrojtjes të NATO-s, paralajmëroi kreu i sindikatës ushtarake të vendit, një rritje e ndjeshme nga objektivi zyrtar i qeverisë prej 203,000.

Ky objektiv u vendos për herë të parë në vitin 2016, shumë kohë para pushtimit në shkallë të plotë të Ukrainës nga Rusia dhe fokusit të ripërtërirë të NATO-s në aftësitë mbrojtëse. Që atëherë, Bundeswehr-i ka luftuar për t’u rritur. Aktualisht ka rreth 181,500 trupa.

“Numri prej 203,000 është i vjetëruar dhe jo më realist”, tha André Wüstner, kryetar i Shoqatës Bundeswehr, një grup interesi me ndikim që avokon për pajisje, personel dhe kushte pune më të mira brenda forcave të armatosura gjermane.

Udhëheqësit e NATO-s do të takohen për një samit në Hagë më 24-25 qershor , ku do të diskutohet rritja e objektivit të shpenzimeve të mbrojtjes të aleancës .

Paralajmërimi i Wüstner vjen pikërisht në kohën kur qeveria gjermane planifikon një program të ri shërbimi ushtarak vullnetar — pjesë e përpjekjeve të saj për të adresuar mungesën kronike të personelit të Bundeswehr-it.

Programi do t’u kërkojë të gjithë burrave 18-vjeçarë të plotësojnë një pyetësor që vlerëson gatishmërinë dhe përshtatshmërinë e tyre për shërbim. Gratë mund të marrin pjesë vullnetarisht. Qëllimi është të rekrutohen rreth 5,000 vullnetarë në vit.

Ministri gjerman i Mbrojtjes, Boris Pistorius, theksoi se programi është “fillimisht vullnetar”, por la derën hapur për të ndërmarrë hapa më drastikë.

“E them këtë me qëllim dhe sinqerisht: Theksi është gjithashtu te ‘fillimisht’, në rast se nuk mund të rekrutojmë mjaftueshëm vullnetarë», u tha ai ligjvënësve në Bundestag më parë këtë muaj. Ende kemi shumë pak njerëz për atë që duhet të arrijnë forcat tona të armatosura”

Gjermania pezulloi rekrutimin ushtarak në vitin 2011. Një rikthim i rekrutimit ushtarak do të shënonte një ndryshim të rëndësishëm politik.