Loading ...
Gjermania dhe Austria njoftuan sot se do të lirojnë një pjesë të rezervave të tyre strategjike të naftës, në përpjekje për të qetësuar rritjen e fortë të çmimeve të energjisë që është shkaktuar nga lufta me Iranin.
Vendimi vjen pas një kërkese nga Agjencia Ndërkombëtare e Energjisë (IEA), e cila u ka kërkuar vendeve anëtare të lirojnë rreth 400 milionë fuçi naftë nga rezervat emergjente, një nga ndërhyrjet më të mëdha të koordinuara ndonjëherë në tregun global të energjisë.
Edhe Japonia bëri të ditur se do të nisë lirimin e një pjese të rezervave të saj duke filluar nga dita e hënë. Ministrat e energjisë të vendeve të G7-s u takuan në Paris për të diskutuar opsionet e mundshme për stabilizimin e tregjeve të energjisë.
Sipas drejtorit të IEA-së, Fatih Birol, vendet anëtare aktualisht mbajnë mbi 1,2 miliardë fuçi rezerva publike emergjente, ndërsa rreth 600 milionë fuçi të tjera mbahen nga industria sipas detyrimeve të qeverive.
Ministrja gjermane e Ekonomisë, Katherina Reiche, tha se Gjermania do të lirojë një pjesë të rezervave të saj në përputhje me kërkesën e IEA-së dhe se dërgesat e para mund të fillojnë brenda disa ditësh.
Ajo theksoi se Gjermania mbështet parimin e solidaritetit ndërkombëtar për të përballuar krizat energjetike.
Kriza aktuale lidhet me përshkallëzimin e konfliktit në Lindjen e Mesme. Irani ka sulmuar anije tregtare në Gji dhe praktikisht ka bllokuar trafikun në Ngushticën e Hormuzit, rrugë nga ku kalon rreth një e pesta e naftës botërore.
