Partia qeverisëse e Gjeorgjisë ka njoftuar se vendi do të pezullojë bisedimet e anëtarësimit në BE deri në vitin 2028 , ndërsa në të njëjtën kohë do të refuzojë grantet buxhetore nga Brukseli.
Si përgjigje, mijëra protestues pro-BE bllokuan rrugët në kryeqytet, ndërsa presidentja e vendit, e cila është një kritike e partisë në pushtet dhe një mbështetëse e rrugës evropiane të Gjeorgjisë, akuzoi qeverinë se i shpalli “luftë” popullit të saj me këtë lëvizje.
Blloku qeverisës i Ëndrrës Gjeorgjiane akuzoi BE-në për “një kaskadë fyerjesh”, duke thënë në një deklaratë se po përdorte mundësinë e bisedimeve të pranimit për të “shantazhuar” vendin dhe për të “organizuar një revolucion në vend”.
“Ne kemi vendosur që të mos e vendosim në rendin e ditës çështjen e hapjes së negociatave me Bashkimin Evropian deri në fund të vitit 2028. Gjithashtu, ne refuzojmë çdo grant buxhetor nga Bashkimi Evropian deri në fund të vitit 2028”, thuhej në deklaratë.
Gjeorgjia, me një popullsi prej 3.7 milionë banorësh, ka në Kushtetutën e saj synimin për t’u anëtarësuar në BE dhe tradicionalisht konsiderohet si një nga vendet më properëndimore ish-sovjetike.
Marrëdhëniet e Gjeorgjisë me Brukselin janë përkeqësuar ndjeshëm në muajt e fundit mes akuzave për autoritarizëm dhe prirje pro-ruse./abcnews.al
