Moti i keq ka penguar kërkimin për të mbijetuar në qytetin brazilian të Petropolis, katër ditë pas përmbytjeve dhe rrëshqitjeve të dheut. Ekipet e emergjencës u detyruan të pezullonin disa herë punën e tyre të shtunën për shkak të shirave të rrëmbyeshëm. Ata thanë se ka pak shpresë për të gjetur dikë të gjallë.
Zyrtarët thanë se 146 persona kanë vdekur, duke përfshirë të paktën 27 fëmijë dhe adoleshentë, ndërsa 191 janë ende të zhdukur. Më shumë se 900 njerëz janë strehuar në shkolla dhe strehimore raporton “BBC”. Të shtunën, punëtorët gërmuan me lopata nëpër rrënoja dhe baltë në një mjegull të dendur. Ekipet e vullnetarëve po ndihmojnë në përpjekjet.
Kërkimet po kryhen me mjete dore dhe sharrë elektrike në zona të paqëndrueshme, ku skuadrat janë ndihmuar nga 41 qen nuhatës. “Është e pamundur të sjellësh makineri të rënda këtu lart,” i tha agjencisë së lajmeve “AFP” Roberto Amaral, kordinator i grupit special të shpëtimit të departamentit lokal të zjarrfiksëve. “Kështu që ne në thelb duhet të punojmë si milingona, duke shkuar pak nga pak”.
Në një nga lagjet më të goditura, deri në 80 shtëpi në një kodër u goditën nga rrëshqitjet e dheut. Deri në 400 persona do t’i bashkohen një përpjekjeje për pastrimin e zonave të tjera të dielën. Reshjet e të martës tejkaluan mesataren për të gjithë shkurtin, duke shkaktuar rrëshqitje dheu dhe përmbytje në qytet, një vendstrehim popullor turistik në veri të Rio de Zhaneiros.
Presidenti Jair Bolsonaro, i cili fluturoi mbi zonën e fatkeqësisë të premten, tha se qyteti po vuante nga “shkatërrim i madh, si skena lufte”. / abcnews.al
