John W Henry, pronar i Liverpool që nga viti 2010 ka reaguar përmes një video-mesazhi pas gjithë trazirave për përfshirjen e klubit në themelimin e Superligës Europiane, aq të kontestuar nga tifozët, lojtarët e stafi i klubit. Amerikani flet troç dhe burrërisht pranon se ka gabuar.
“Dua tu kërkoj falje të gjithë tifozëve dhe mbështetësve të Liverpool për përçarjen që kam shkaktuar gjatë 48 orëve të fundit. Është e kuptueshme, por duhet thënë se projekti i paraqitur kurrë nuk do të qëndronte pa mbështetjen e tifozëve. Askush nuk mendoi ndryshe në Angli. Gjatë këtyre 48 orëve, ju ishit shumë të qartë se nuk do të qëndronte. Ne ju dëgjuam. Unë ju dëgjova.
Dua të kërkoj falje për Jurgen Klopp, për Billy Hogan (shefi ekzekutiv), për lojtarët dhe për këdo që punon aq shumë te Liverpool për t’i bërë tifozët tanë krenarë. Ata nuk kanë absolutisht asnjë përgjegjësi për këtë përçarje. Ata (lojtarët dhe stafi) ishin më të pafajshmit dhe u sulmuan padrejtësisht. Kjo është ajo që dhemb më shumë. Ata e duan klubin dhe punojnë për t’ju bërë krenarë çdo ditë.
Unë e di që i gjithë ekipi i Liverpool ka ekspertizën, udhëheqjen dhe pasionin e nevojshëm për të rindërtuar besimin dhe për të na ndihmuar të ecim përpara. Më shumë se një dekadë më parë, kur u regjistruam për sfidat që lidhen me futbollin, ne ëndërruam atë që ju ëndërroni. Dhe ne kemi punuar shumë për të përmirësuar klubin. Puna jonë nuk është përfunduar.
Liverpool owner John W Henry says sorry.
(?: @LFC)pic.twitter.com/CsS57vnKfr
— B/R Football (@brfootball) April 21, 2021
Dhe shpresoj se do ta kuptoni se edhe kur bëjmë gabime, ne përpiqemi të punojmë në interesin më të mirë të klubit. Në këtë përpjekje, ju kam zhgënjyer. Përsëri, më vjen keq dhe unë jam përgjegjës për negativitetin e panevojshëm të sjellë gjatë dy ditëve të fundit. Është diçka që nuk do ta harroj. Kjo tregon fuqinë që tifozët kanë sot dhe me të drejtë do të vazhdojnë të kenë.
Nëse ka një gjë që kjo pandemi e tmerrshme ka treguar qartë, është se sa thelbësorë janë tifozët për sportin tonë dhe për çdo sport tjetër. Kjo është parë në çdo stadium bosh. Ka qenë një vit tepër i vështirë për të gjithë ne, praktikisht askush nuk është i paprekur.
Është e rëndësishme që familja e futbollit Liverpool të mbetet e paprekur, jetësore dhe e përkushtuar ndaj asaj që kemi parë nga ju globalisht, me gjeste të mirësisë dhe mbështetjes. Unë mund t’ju premtoj se do të bëj gjithçka që mundem për ta çuar më tej atë”, shprehet Henry. /abcnews.al
