Loading ...Qytetarët kanë marrë 4.64 miliardë lekë kredi për blerje banesash gjatë muajit korrik. Të dhënat e Bankës së Shqipërisë tregojnë se huaja për këtë segment ka pësuar rritje të qëndrueshme nëse e krahasojmë me të njëjtën periudhë të një viti më parë duke rezultuar 12.5% më e lartë.
Ky trend reflekton një kërkesë të shtuar për financime dhe investime në pasuri të paluajtshme. Kredia në lekë zë peshën më të madhe, e cila ka shënuar edhe rritjen më të lartë. Megjithatë nëse vërejmë statistikat e kredi-dhënies për muajin qershor konstatohet një ulje e huasë së aprovuar për këtë segment.
Bankat e nivelit të dytë kanë aprovuar vetëm 4.64 miliardë lekë nga 7.2 miliardë kredi të reja për blerje banese, që u miratuan ne muajin qershor të po këtij viti.
Kjo zbehje e huadhënies lidhet direkt me hyrjen ne fuqi të rregullores së Bankës së Shqipërisë e cila kufizon dhënien e kredive për banesa e cila ka nisur të zbatohet që prej 1 korrikut. Vendimi i Këshillit Mbikëqyrës të Bankës së Shqipërisë kufizon kredi-dhënien për blerje banese duke lejuar vetëm 85% të vlerës së pronës nëse është banesë e parë. Ndërsa për shtëpinë e dytë kredia ulet në 80% të vlerës së saj.
Pra kur nëse blejmë një shtëpi që kushton 100 mijë euro, nëse kredia kërkohet në lekë, atëherë banka mund të financojë vetëm 85 mijë euro. Ndërsa për huatë në monedhë të huaj, financimi për banesën e parë ulet në 75% të shumës totale.
Sipas të dhënave të Bankës së Shqipërisë totali i kredisë ka arritur në 893.1 miliardë lekë në Korrik duke pësuar një rritje me gati 94 miliardë lekë.
