Në reagimet e para të partive kryesore të Asamblesë Kombëtare Franceze për emërimin e Michel Barnier si kryeministër të ri të vendit, Jean-Luc Mélenchon e dënoi këtë zgjedhje, duke sulmuar presidentin Emmanuel Macron.
Në të njëjtën kohë, partia Alarm Kombëtar (RN) e ekstremit të djathtë të Marine Le Pen duket se po mbante një qëndrim pritës ndaj lëvizjeve politike të kryeministrit të sapoemëruar konservator.
“Zgjedhjet iu vodhën popullit francez,” tha Jean-Luc Mélenchon, i cili është pjesë e Frontit të Ri Popullor, një koalicion i gjerë partish që variojnë nga socialistët deri te Franca e Pabindur e Mélenchon, e cila doli e para në zgjedhje.
“Presidenti sapo ka vendosur të mohojë zyrtarisht rezultatin e zgjedhjeve parlamentare që ai kishte shpallur. Nuk është Fronti i Ri Popullor, që doli i pari në zgjedhje, ai që do të ketë kryeministrin. Pra, zgjedhjet iu vodhën popullit francez. Mesazhi u refuzua”, vazhdoi Melanchon.
Udhëheqësi i RN Jordan Bardela tha se partia e tij do të “(gjykojë) fjalimin politik” të kryeministrit të ri përpara se të vendosë qëndrimin e saj. “Ne do të kërkojmë që urgjencat kryesore të francezëve, fuqia blerëse, siguria, emigracioni, të adresohen përfundimisht dhe ne rezervojmë të drejtën të ushtrojmë çdo mjet politik veprimi nëse kjo nuk ndodh në javët e ardhshme,” tha ai.
Presidenti francez Macron emëroi sot Michel Barnier, ish-kryenegociatorin e Bashkimit Evropian për Brexit, kryeministër të vendit, njoftoi Elysee. Emërimi vjen 60 ditë pasi zgjedhjet e parakohshme parlamentare zgjodhën një Asamble Kombëtare pa shumicë. Barnier tani është i mandatuar për të formuar një qeveri të re, në një lëvizje që synon t’i japë fund javëve të bllokimit politik./abcnews.al
