Zyrtarët palestinezë njoftuan se forcat izraelite vranë një djalë 13-vjeçar në Bregun Perëndimor të pushtuar.
Ushtria izraelite tha se hapi zjarr ndaj palestinezëve që po gjuanin me gurë automjetet izraelite.
Forcat izraelite gjithashtu nisën një tjetër bastisje këtë të martë në kampin e refugjatëve Nur Shams pranë qytetit Tulkarm të Bregut Perëndimor, duke shkatërruar disa ndërtesa dhe duke arrestuar disa njerëz.
Dhuna është intensifikuar në Bregun Perëndimor që nga fillimi i luftës në territorin tjetër palestinez të Rripit të Gazës dhe më shumë se 570 palestinezë janë vrarë nga zjarri izraelit në territorin e pushtuar.
Ministria palestineze e Shëndetësisë konfirmoi vrasjen e 13-vjeçarit Ghassan Garib Zahran në fshatin Deir Abu Mashal, në veriperëndim të Ramallah.
Nur Shams, një kamp refugjatësh i krijuar në vitin 1948 gjatë luftës që shpërtheu pas themelimit të Izraelit, dyshohet se është bërë një bastion i ekstremistëve muajt e fundit./abcnews.al
