Mbrojtësi i Atletico Madrid, Kieran Trippier, ka deklaruar se Diego Simeone është trajneri më i mirë në botë. Argjentinasi është nën presionin e mediave në Spanjë, pasi ekipi i tij po kalon një formë të dobët. Eliminimi nga Kupa e Mbretit si dhe performanca e dobët e skuadrës janë arsyet se edhe tifozët kërkojnë largimin e “El Cholos”. Por, anglezi i ka dalë në mbrojtje trajnerit të tij duke e mbështetur atë.
“Për mua personalisht Simeone është trajneri më i mirë. Kur ti luan për të e kupton se sa i aftë është ai. Unë kam punuar me shumë trajnerë të mëdhenj në të kaluarën time, por pasionin e tij për lojën nuk e kam parë tek askush tjetër. Ai është i pabesueshëm dhe unë jam me fat që po mësoj nga ai,” deklaron mbrojtësi 29-vjeçar për “BBC”.
Trippier u transferua në Madrid verën e kaluar nga Tottenham dhe në intervistën e tij tregon dhe për aventurën e tij në Spanjë. “Është e mrekullueshme jeta këtu. Për mua ka shumë rëndësi që gruaja dhe dy fëmijët e mi të jenë në një vend komod për ta dhe Madrid iu është përshtatur shumë mirë. Po përmirësohem me spanjishten, por kuptoj më shumë se sa mund të flas. Stafi dhe lojtarët më kanë ndihmuar shumë, kanë qenë fantastikë me mua. Dua ti falënderoj që të gjithë ata,” mbyll Trippier. /abcnews.al
