“Në këto ditë të vështira dhe të pazakonta për të gjithë ne, duhet te jemi të duruar e të kujdesshëm gjatë gjithë kohës… jo neglizhent! NDËRKOHE MOS HARRONI: *5-1 është orari më i ri i lëvizjes për këmbësorët duke filluar nga dita e nesërme”, ngacmonin Fanatics një ditë më parë rivalët e përjetshëm, ultrasit e Partizanit.
Guerrils, që në derbi shkruanin se “ju jeni më artificialë se liqeni”, e kanë gjetur edhe përgjigjen për ultrasit bardheblu. Nuk ktheheshin shumë pas në kohë, por vetëm një sezon më parë, kur Partizani fitoi titullin kampion.
Ai moment nuk u përjetua mirë nga tifozët e Tiranës, që panë rivalët e tyre të shpalleshin kampionë në shtëpinë e tyre, në derbi dhe më pas fusha ishte e gjitha e pushtuar nga tifozët.
Mesazhi i Guerrils është i gjetur dhe i kuptueshëm për të gjithë: “Ishte koha kur s’kishte nevojë për karantinë që dikush të mbyllej më shtëpi…”. Me siguri atë ditë tifozët e Tiranës nuk janë ndjerë mirë, ata më fanatikët sigurisht, pasi ka edhe nga ata që i kanë shtrënguar duart rivalit. /abcnews.al
