Sot është dita e Carlo Ancelottit, i cili vazhdon të flasë në lidhje me disa tema në konferencën për shtypin. Real Madrid e riktheu në stol, vendim që ka gëzuar të gjithë tifozët e skuadrës së famshme. Trajneri italian ka firmosur një kontratë 3-vjeçare me klubin spanjoll.
Futbolli do të jetë sulmues si gjithmonë, për merkaton kërkon kohë pasi duhet të bisedojë me drejuesit, teksa nënvizon që ky është një rikthim në shtëpi për të. Ancelotti drejtoi Realin në vitet 2013-2015, periudhë gjatë së cilës fitoi 4 trofe, mbi të gjitha i dhuroi klubit Championsin e dhjetë.
“Rikthimi ndodhi shpejt dhe nuk kam pasur mundësi të bisedoja gjatë me drejtuesit. I njoh shumë mirë lojtarët, ndihem i lumtur që do të punoj sërish me ta. Në ditët e ardhshme do të mësojmë të ardhmen e Sergio Ramos, por edhe lojtarëve të tjerë.
LEXO EDHE: Ancelotti: Rikthehem në shtëpi, përgatituni për një Real spektakolar
Sergio është shumë i rëndësishëm për ne, ai ka qenë vendimtar për gjithçka ka ndodhur këtu në vitet e fundit. Nuk i di detajet e rinovimit, por sigurisht që do të ulem e do të flas hapur me të në lidhje me këtë çështje.
Është një përgjegjësi e bukur të jesh trajneri i Real Madrid, klubit më të madh në botë. Sigurisht që përgjegjësia është më e madhe se diku tjetër, por e pranoj me kënaqësi. Ka rëndësi të madhe të jemi një skuadër e ekuilibruar, cilësore, që sakrifikon dhe me lojtarë që dinë të luajnë me njëri-tjetrin“.
Më pas një koment për individët e skuadrës, me shumë prej të cilëve ka punuar në aventurën e parë. “Kam afeksion për Bale, Marcelo dhe Isco, të gjithë do t’i motivoj shumë, pasi duhet të jesh gjithmonë i motivuar në maksimum kur luan me Real Madrid.
Benzema? 30 gola nuk mjaftojnë, Benzema duhet të shënojë 50 gola në sezon. Edhe të tjerët duhet të japin kontributin e tyre. Jam i lumtur për Karim, ai është përmirësuar shumë, por kemi edhe lojtarë të tjerë plot kualitet“.
Në fund një koment për Zinedine Zidane dhe Cristiano Ronaldon. “Çfarë mund të them për Zizou? Ai ka fituar 3 Champions League radhazi, ka kryer një punë fantastike. Të gjithë duhet ta falënderojnë. Ky është futbolli, një ikën e një tjetër vjen, por puna e Zidane ka qenë e jashtëzakonshme.
CR7? E dua shumë, por nuk kam biseduar me të këto ditë dhe nuk më pëlqen të flas për lojtarë të skuadrave të tjera. Ai është nën kontratë me Juven dhe nuk është korrekte të flas për të. E dua shumë dhe i uroj të jetë i lumtur.
Një gazetar italian më pyeti nëse Cris ndodhet në vitet e fundit të karrierës. Unë i thashë: ai shënoi 35 gola në sezon, e ka ulur ritmin e golave, kështu që po, ndodhet në fundin e karrierës“, përfundoi Carlo Ancelotti. /abcnews.al
