ante rebic

Rebic-Ibra.jpg
Igli Nikolli18:46 | 27/02/2020

Ante Rebic u transferua verën e kaluar te Milani dhe po konfirmohet si një ndër goditjet më të rëndësishme të drejtuesve kuqezi. Kroati hasi vështirësi në fazën e parë të sezonit, njësoj si e gjithë skuadra, por pas janarit historia ka ndryshuar.

26-vjeçari ka fituar postin e titullarit dhe ka shënuar 7 gola pas ardhjes së Zlatan Ibrahimovic. Rebic është huazuar për dy vite nga Eintracht Frankfurt, por ka një kusht për të qëndruar në Milano.

Sportmediaset raporton se lojtari ofensiv e ka shprehur dëshirën e tij për të vijuar karrierën te Milani, por me një pakt. Nënkampioni i botës me Kroacinë ka kërkuar që të konfirmohet edhe Zlatan Ibrahimovic.

Suedezin e ka idhull dhe po zbavitet duke luajtur përkrah tij. E ardhmja e Ibrës është akoma e paqartë dhe gjithçka do të vendoset në fund të sezonit. Tifozët shpresojnë që gjiganti 38-vjeçar të vijojë të mbajë veshur fanellën e Milanit edhe sezonin tjetër, të njëjtën dëshirë që ka edhe Ante Rebic. /abcnews.al

Rebic-Milan.jpg
Klejdi Kaimi18:17 | 24/02/2020

Njeriu i momentit te Milani është Ante Rebic. Sulmuesi kroat me golat dhe lojën e tij të mirë ka bërë për vetë të gjithë popullin kuqezi. Ai numëron plot gjashtë gola në shtatë ndeshjet e fundit në Seria A dhe është kthyer në një pikë kyçe për kuqezinjtë.

Rebic mbërriti në Milano në ditën e fundit të merkatos së verës nga Eintracht Frankurt, ku ndërroi vendet me Andre Silvën. 26-vjeçari erdhi në huazim për dy vite dhe tashmë drejtuesit e Milanit duhen të vihen në lëvizje nëse duan ta blejnë kroatin. Klubi gjerman kërkon 40 milionë euro për kartonin e tij, ose do të pranojë ofertën e Fiorentinës.

Klubi nga Firenze mund të përfitojë nga kjo situatë. Në vitin 2018, Fiorentina e shiti sulmuesin tek Eintrachti për vetëm 2 milionë euro, por me një klauzolë. Ata mund ta riblejnë në të ardhmen Anten me një ulje që varion deri në 50% të vlerës së kartonit të tij. Pra, nëse Milan nuk paguan 40 milionë euro, atëherë Rebic mund të përfundojë te Fiore për 20 milionë euro. /abcnews.al

 

Ante Rebic kur luante për Fiorentinën
Rebic.jpg
Igli Nikolli19:23 | 19/02/2020

Ante Rebic është lojtari më në formë i Milanit për momentin. Kroati e ka nisur në mënyrë spektakolare vitin 2020 dhe ia ka dalë të shënojë 6 gola të rëndësishëm. 26-vjeçari ofensiv ka realizuar ëndrrën e tij për të luajtur përkrah Zlatan Ibrahimovic, teksa bën një krahasim midis Serie A dhe Bundesligës në një prononcim për Dalmatinski Portal.

Më në fund po aktivizohem vazhdimisht dhe po tregoj aftësitë e mia. E kam të vështirë për të shfrytëzuar mundësitë e mia kur aktivizohem rrallë. Tani po më shkon gjithçka mirë. Serie A? Nuk e konsideroj kampionat më të vështirë se ai gjerman.

Motra ime më nisi pak ditë më parë një foto të një gazete të vitit 2012. Aty shprehesha se ëndërroj që një ditë të luaj përkrah Zlatan Ibrahimovic. Sot është realitet diçka e tillë dhe është kënaqësi të shijoj çdo ditë kualitetin dhe eksperiencën e tij. Zlatan po na ndihmon shumë.

Boban? Ai është një figurë shumë e rëndësishme për ne. Vjen gjithmonë në dhomat e zhveshjes pas përfundimit të ndeshjeve për të na inkurajuar. E bën këtë gjë shpeshherë edhe në seancat stërvitore“, përfundon Ante Rebic. /abcnews.al

Leao-Rebic-Milan.jpg
Vladimir Prenga22:31 | 17/02/2020

Europa nuk është një ëndërr për Milanin. Skuadra e madhe italiane shpreson pas fitoreve në Serinë A, falë Zlatan Ibrahimovic e kroatit Rebic

Edhe kur duket sikur nuk është, mbetet i rëndësishëm. Zlatan Ibrahimovic mund të marrë një vlerësim aspak pozitiv për atë që bëri këtë të hënë, por personaliteti i suedezit të madh e ndihmoi Milanin që të arrinte një tjetër sukses.

Nota e “La Gazzetta dello Sport” nuk ishte më e lartë se 6-të, veçse rëndësi ka prania në fushë e Ibrës, edhe kur humbet gol të sigurt.  Skuadra kuqezi mposhti 1-0 Torinon, duke bindur trajnerin Stefano Pioli se e ardhmja është e mire, madje mund të synohet edhe Europa.

“Sonte ishte një ndeshje shumë pozitive, – u shpreh trajneri milanist, – ne luajtëm shumë mirë në pjesën e parë, dhe mund të arrijmë aty ku duhet. Duhej ta kishim vrarë ndeshjen në pjesën e dytë kur kishim rastet. Gjithsesi, i përballuam vështirësitë, duke luajtur të bashkuar e duke pësuar shumë pak rreziqe. Kjo ishte, pra, një tjetër javë e mirë”.

Kroati Ante Rebic shënoi golin e vetëm në “San Siro”, në fitoren që ndihmoi Milanin të ngjitej në kuotën e 35 pikëve, duke qenë tani në një nivel me Parmën e Veronën, dhe jo larg Romës, pra me shpresë për kualifikim të paktën për në Ligën e Europës.

Për sulmuesin e marrë hua ishte goli i 6-të në 7 ndeshjet e fundit. “EuroMilan nën shenjën e kroatit, – titullon “La Gazzetta dello Sport”, që ka pikërisht Rebiçin si foto të kopertinës, ndërsa bën lojë fjalësh me mbiemrin e tij dhe shkronjën anglisht “ë” për fitoren”.

Edhe pse mbeten ende dyshime, sërish skuadra e madhe milaneze duket si e rikthyer. Ndoshta, jo me një projekt afatgjatë, por gjithsesi me ndihmën e Ibrës mund të arrihen fitoret, të shtohen të ardhurat, dhe të synohet sërish lavdia e dikurshme në Itali dhe në Champions. /abcnews.al

Rebic-Ante.jpg
Igli Nikolli22:39 | 24/01/2020

Milani merr fitoren e tretë radhazi në kampionat dhe të katërtën radhazi duke llogaritur edhe suksesin 3-0 në Kupën e Italisë kundër Spal. Ekipi i Stefano Piolit iu fal sërish Ante Rebic për të siguruar tre pikët e radhës.

Pjesa e parë u mbyll pa gola, teksa Zlatan Ibrahimovic humbi një rast të pastër pas pasimit të Theo Hernandez. Pioli veproi njësoj si kundër Udineses. Ante Rebic u hodh në fushë në fillimin e pjesës së dytë në vend të Leoas dhe ndërrimi dha efektin e pritur.

26-vjeçari shtyu topin në rrjetë në minutën e 71-të (goli i tretë në kampionat për të) dhe tifozët e “Djallit” nisën festën. Vendasit nuk patën forcën e duhur për të reaguar, ndërsa kuqezinjtë administruan avantazhin e artë dhe kthehen në Milano me një fitore të rëndësishme jashtë fushe. /abcnews.al

Brescia – Milan 0-1
(Rebic 71′)

Rebic-2.jpg
Igli Nikolli22:16 | 24/01/2020

Ante Rebic po konfirmohet njeriu i momentit te Milani. Kroati ka zhbllokuar ndeshjen e komplikuar kundër Brescias dhe ka kaluar kuqezinjtë në avantazh. Goli i tretë brenda pak ditësh për sulmuesin kroat, i cili u fut në fushë në minutën e 58-të në vend të Leaos.

26-vjeçari zhbllokoi shifrat në minutën e 71-të pas inistimit në zonën e ekipit vendas, teksa dhe ekipi i Piolit është shumë afër sigurimit të një fitore tepër të rëndësishme. /abcnews.al

Rebic-1.jpg
Igli Nikolli14:44 | 19/01/2020

Ante Rebic gjeti golat e parë me Milanin. Dy gola të rëndë ato të kroatit, i cili i dhuroi fitoren ekipit të tij. Sulmuesi u fut në pjesën e dytë në fushë dhe ishte njeriu vendimtar i fitores së Milanit. 26-vjeçari tregohet modest dhe i përulur, teksa komenton edhe afrimet e merkatos së janarit.

Pata mundësinë time dhe jam i kënaqur që e shfrytëzova. Kam treguar vlerat e mia në ndeshjet e fundit, por rëndësi kanë tre pikët. Kemi marrë dy-tre lojtarë të rëndësishëm, si Ibra, Kjaer dhe Begovic, të cilët po na ndihmojnë shumë në aspektin e personalitetit të ekipit.

Rezultatet po vijnë, por nuk dua të flas për objektivat tona. Duhet t’i marrim ndeshjet një nga një me synim mbledhjen e sa më shumë pikëve“, thekson 26-vjeçari i ekipit të Stefano Piolit. /abcnews.al

rebic-hernandez-1280x800.jpg
Vladimir Prenga14:29 | 19/01/2020

Milani fiton në frymën e fundit. Udinese u mundua të surprizonte, por në fund kuqezinjtë triumfuan me shifrat 3-2. Nisje e keqe, por kuqezinjtë në shtesë ia dolën të gëzojnë dhe të marrin tre pikët, që vlejnë shumë në rrugëtimin e tyre.

Në minutën e gjashtë. Portieri Gigio Donnarumma e teproi me një dalje nga zona dhe bardhezinjtë realizuan me Stryger Larsen. Milani u vu në lëvizje dhe u mundua të barazonte shifrat, por pa ia arritur qëllimit në 45 minutat e para.

Trajneri Stefano Pioli hodhi në fushë Ante Rebic dhe kroati e shpërbleu besimin e dhënë, duke shënuar tre minuta pasi zbriti në fushë. Një aksion model, kombinime të bukura mes Conti-Leao, me mbrojtësi që shërbeu në zonë dhe Rebic u tregua i saktë me gjuajtjen e tij.

Duhej sërish gol dhe këtë herë ishte një mbrojtës që çoi stadiumin “San Siro” peshë. Theo Hernandez, me një gjuajtje nga jashtë zone shtangu portierin vendas me një “predhë”. Milani në avantazh, por festën e prishi Lasagna, i cili barazoi me një goditje me kokë.

Gjithsesi skuadra e drejtuar nga Stefano Pioli reagoi dhe në minutat shtesë Ante Rebic u kthye në hero për Milanin, pasi me një lëvizje dhe një gjujatje të bukur nxori duarbosh kundërshtarët e Udinese. /abcnews.al

rebic-gfol.jpg
Vladimir Prenga13:42 | 19/01/2020

Milani ka barazuar kundër Udinese dhe autori i golit është sulmuesi Ante Rebic. Kroati u hodh në fushë në fushë në fillimin e pjesës së dytë dhe ia doli të gjente rrugën e rrjetës pas tre minutash.

Një aksion i bukur i Milanit nga e djathta, me mbrojtësin Andrea Conti që ishte protagonist. Pasimi i tij në zonë u konkretizua me gol nga Rebic dhe tani kuqezinjtë do të kërkojnë përmbysjen.

Për kroatin ky është goli i parë në Serie A, pas nëntë ndeshjesh. E ardhmja e sulmuesit te Milani ishte vënë në dyshim, por kuqezinjtë nuk hoqën dorë nga shërbimet e tij, edhe pse në Gjermani e dëshironin. /abcnews.al

Rebic-Milan.jpg
Veronik Istrefaj19:17 | 08/01/2020

Drejtori i Eintracht Frankfurt, Fredi Bobic, ka hedhur poshtë të gjitha zërat që flisnin për një rikthim të Ante Rebic te skuadra gjermane. Flitej se sulmuesi anësor do të rikthehej tek ekipi i Frankfurtit në formë huazimi për gjashtë muaj, duke parë dhe vështirësitë e tij te Milani.

Edhe pse kishte shumë zëra në lidhje me këtë lëvizje, Bobic foli hapur dhe mohoi gjithçka në një intervistë për Kicker: “Nuk ka asnjë të vërtetë. Disa medie italiane raportuan se do të ketë një rikthim të Rebic, por ne nuk e kemi menduar për asnjë moment një skenar të tillë”.

26 vjeçari kroat iu bashkua Milanit gjatë merkatos së verës, huazim dy vjeçar dhe me opsion blerje. Edhe pse pritej shumë nga Rebic, ai ka zhgënjyer, duke luajtur vetëm 177 minuta në Serie A dhe duke mos bindur aspak./abcnews.al

Drejtori sportiv i Eintracht Frankfurt, Fredi Bobic


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono