altin hajri

okej.jpg
Autor E16:19 | 12/02/2020

Vëllezërit e Jan Prengës kanë folur disa herë në telefon me një “boss të drogës” që bën burg në Ekuador si edhe Gentjan Doçin nga Dukagjini pas pengmarrjes me qëllim gjetjen e një marrëveshjeje për kthimin pengut.

Në dëshminë e Anton Prengës, vëllait të Jan Prengës, të cilën e ka zbardhur abcneës.al, ai tregon para prokurorëve se vëllai tjetër Ndrek Prenga ka folur në telefon me Gentjan Doçin dhe “Gramozin nga Vlora”, të cilët i kanë kërkuar dorëzimin e sasisë së kokainës së rrëmbyer.

Në dëshmi duket një moment kur “Gramozi nga Vlora” shprehet se nuk po lidhet dot në telefon ne Gentjan Doçin “pasi kishte pirë mall dhe duhej të prisnin deri sa t’i dilte..”.

Pamje nga garazhi i kompleksit “Golden” ku u rrah per vdekje Jan Prenge

Në fund, Gramozi i është shprehur vëllait të Jan Prengës se pengmarrësit i kishin dalë nga fjala duke e vrarë pengun, gjë që e detyroi atë të tregonte emrat e pengmarrësve.

Pjesë nga dëshmia e Anton Prengës:

Ditën e mërkurë të kësaj jave mesa më kujtohej ka qënë data 22 janar 2020, është kthyer malli dhe po atë ditë Gramozi, ka kontaktuar në telefon me Ndrekën Astritin dhe Gëzimin dhe ju ka thënë se brenda dy orësh vëllai i marrë peng Jan Prenga do lirohet.

Pasi kemi pritur 2-3 orë dhe vëllai s’po lirohej të nesërmen ka fol vëllai im Ndreka me Gramozin dhe ai Gramozi, i ka thënë që s’ka mundësi që nuk është liruar.

Më pas Ndreka është lidhur sërisht me Gramozin dhe ai i ka thënë se me njërin prej tyre kishte kontaktuar ndërsa me një tjetër nuk kishte kontaktuar ende, pasi ai kishte pirë mall dhe pa i dalë malli nuk kontaktojmë dot.

Gramozi, gjithashtu i ka thënë vëllait mos  të shqetësohej se vëllai ishte shëndoshë e mirë dhe do të lirohet pasi ti dali malli personi që përmendi ai më lart.

Pasi ka kaluar sërisht kohë dhe vëllai spo lirohej, vëllai im Ndreka ka kontaktuar sërisht me telefon me Gramozin dhe në këtë moment Gramozi, i ka thënë se më kanë lëvizur nga fjala ata personat, unë të detyrohem të të jap emrat e tyre dhe i ka thënë vëllait se personat të cilët e kanë marrë peng apo kanë organizuar pengmarjen quhen Gentjan Lush Doçi, Gentjan Nik Bleta dhe një shtetas tjetër me emrin Korado Doda. /abcnews.al

ofl-policia-shijak-.jpeg
nev ila19:04 | 03/02/2020

Dalin pamjet nga operacioni i parë anti-KÇK në Shijak në pronën e Altin Hajrit, i cili është shpallur në kërkim për pengmarrjen dhe vrasjen e Jan (Jak) Prengës.

Ndryshe nga çdo operacion tjetër, kësaj herë njoftimi i plotë është lexuar nga një efektive e cila është kamufluar për të mos zbuluar identitetin e saj, po ashtu edhe efektivët e tjerë shihen të maskuar për të evituar identitetin e tyre.

Ndërkohë qeveria ka komunikuar se prej ditës së sotme ka filluar Operacioni Forca e Ligjit, me veprime konkrete në terren. Ky operacion ka për qëllim sekuestrimin e pasurive të krijuara nga krimi i organizuar.

Njoftimi i Plotë: 

“3 shkurt, nis OFL

Prej ditës së sotme ka filluar Operacioni Forca e Ligjit, me veprime konkrete në terren.

Ky operacion ka për qëllim sekuestrimin e pasurive të krijuara nga krimi i organizuar.

Operacioni Forca e Ligjit do të zhvillohet nga Forca e Posaçme OFL në Policinë e Shtetit, në bashkëpunim me SPAK-un, agjencitë ligjzbatuese dhe partnerët, duke bërë të mundur evidentimin dhe goditjen me anë të sekuestrimit të pasurive të deklaruara apo të fshehura të personave apo grupeve kriminale që i kanë përfituar ato nëpërmjet aktivitetit kriminal në fushën e krimit të organizuar.

Në këtë kuadër, sot, në zbatim të ligjit special për masat pasurore ndaj individëve të dënuar apo akuzuar për krim të organizuar, Operacioni Forca e Ligjit ka vendosur sekuestron e parë mbi objektin kompleksi i shërbimeve “Vila Golden” dhe mbi një karburant të dhënë me qira një shoqërie për tregtimin e hidrokarbureve, që ndodhet në kryqëzimin Pjezge Xhafzotaj, Shijak, pronë e shtetasit Altin Bajram Hajri.

Ky shtetas është dënuar me burg nga autoritet italiane të drejtësisë, me urdhër arrestin e datës 15.08.2015, për veprën penale “Trafikimi i lëndëve narkotike, kryer në bashkëpunim”.

Aktualisht, ky shtetas është shpallur në kërkim nga Policia e Shtetit, në funksion të hetimeve për procedimin penal nr. 475, viti 2020, për veprën penale “Rrëmbim ose mbajtje peng e personit, e kryer në bashkëpunim”, ngjarje kjo që lidhet me rrëmbimin e shtetasit J. P.

Sekuestrimi i këtij objekti dhe i të gjitha pronave të shtetasit Altin Hajri bëhet në bazë të elementit të urgjencës të parashikuar në Ligjin Special.

Me vendosjen e kësaj mase sekuestroje, objekti kalon në administrim të Agjencisë së Administrimit të Aseteve, e cila në bazë të Ligjit Special është vendosur nën varësinë e Ministrisë së Brendshme.

Dosja pasurore e shtetasit Altin Hajri do t’i kalojë menjëherë SPAK-ut dhe në jo më shumë se 15 ditë SPAK-u duhet t’ia dërgojë Gjykatës Speciale, e cila ka 15 dite kohë për të konfirmuar masën e sekuestrimit duke hapur rrugën për konfiskimin përfundimtar të pasurisë së shtetasit Altin Hajri.

Pas konfiskimit, pasuria në fjalë i kalon përfundimisht Ministrisë së Brendshme, e cila do të vendosë për shfrytëzimin ose shembjen e këtij objekti, si edhe do të marrë në zotërimin e saj dhe do të përdorë për interesin publik paratë, makinat dhe tokat që aktualisht zotërohen nga ky shtetas.

Policia e Shtetit, nëpërmjet strukturës së posaçme OFL është e vendosur që në bashkëpunim me SPAK-un dhe agjencitë e tjera ligjzbatuese brenda dhe jashtë vendit ta çojë deri në fund këtë operacion jetik, me interes të madh kombëtar e ndërkombëtar”./abcnews.al

cb76566a-085c-42d3-843a-ccc04f710b3b.jpg
Autor E11:25 | 31/01/2020

Kanë dalë për herë të parë imazhet e pesë personave të arrestuar për rrëmbimin, vrasjen dhe zhdukjen e Jan Prengës më datë 17 janar.

Të gjithë ata janë aktualisht në gjykatë për të marrë masën e sigurisë për këtë akuzë të rëndë, krim i cili ka mbërthyer organet e zbatimit të ligjit që nga mesi i këtij muaji.

Të arrestuar për ngjarjen janë Leonard Hajri, babai i tij Bajram Hajri. Të dy ata janë vëllai dhe babai i Altin Hajrit, i cili akuzohet si organizatori i pengmarrjes së Jan Prengës. Të tjerë të arrestuar janë Elton Hajri, Olsi Turja dhe Festim Bexhdili, shkruan abcnews.al.

Këta persona së bashku me Altin Hajrin, pronari i kompleksit ‘Golden’ në Shijak ku vdiq Jan Prenga mendohet se kanë ekzekutuar vetëm urdhrin nga “kokat” e bandës që kishin porositur rrëmbimin e Jan Prengës në Kamëz më 17 janar të këtij viti.

Rrëmbimi i Prengës ka ardhur për shkak të një sasie prej 278 kg kokainë, që vëllai i Jan Prengës, Astrit Prenga mbante peng në Angli dhe nuk e tregonte se ku e kishte çuar. Ky i fundit është ndodhet i arrestuar në Angli. /abcnews.al

a917a6b6-9429-42ca-8dae-181c13942970.jpg
Autor E10:29 | 30/01/2020

Gjykata Penale e Tiranës pritet të japë nesër masën e sigurisë për pesë personat e arrestuar ditët e fundit me akuzën e rrëmbimit dhe vrasjes së Jan Prengës më datë 17 janar.

Seanca do të mbahet në orën 10:30 të paradites së nesërme nën masa të rrepta sigurie.

Jan Prenga u rrëmbye më datë 17 janar dhe u godit ndërkohë që po çohej në kompleksin “Golden” sipas policisë.

Gjatë asaj dite autorët e nxorrën atë të vdekur nga kompleksi duke e futur në qese të zeza për ta groposur diku.

Të arrestuar për këtë ngjarje të rëndë janë Bajram Hajri, Elton Hajri, Leonard Hajri, Olsi Turja dhe Festim Bexhdili. /abcnews.al

e230eae2-382f-4e98-bdbc-4e4c6fb8b74d.jpg
R D21:17 | 29/01/2020

Gazetari Artan Hoxha në emisionin “Byro Politike” publikon pamjet ekskluzive të shtetasit Altin Hajri, i arrestuar nga grupi i gatshëm dhe forca operacionale të policisë së qarkut Durrës më datë 26 janar 2017. Hajri i akuzuar si drejtuesi i grupit kriminal që rrëmbeu dhe më pas zhduku pa lënë gjurmë kufomën e Jan(Dod) Prengës më datë 17 janar 2020, për më shumë se një dekadë e gjysmë ka qenë një nga boss-et më të njohur të trafikut të heroinës afgane nga Shqipëria në drejtim të Italisë.

Gazetari i Abc News Artan Hoxha u shpreh se Hajri u shpall në kërkim ndërkombëtar pas një operacioni të policisë italiane më 28 tetor 2015 që synonte të shpërbënte të gjithe grupin Hajri dhe rrjetin e tij në Itali. Pavarësisht se u kap mbi një ton lëndë narkotike, heroinë, kanabis etj. Altin Hajri koka drejtuese e grupit nuk u arrestua.

Afro 8 muaj më vonë në rrethana të paqarta, më 6 maj 2016 emri i Hajrit u hoq nga lista e personave të kërkuar nga Interpoli. Emri i tij është rregjistruar gjatë bisedave të pergjuara nga prokuroria për llogari të dosjes 339, si i implikuar bashkë me persona të tjerë të botës së krimit në zonën e Shijakut dhe të Durrësit të përfshirë në blerjen e votave gjatë zgjedhjeve parlamentare të vitit 2017.

EMISIONI I PLOTË

Në video shfaqet momenti kur Hajri sapo ka shkuar me mjetin e tij, një Mercedes Benz luksoz pranë një lavazhi në zonën e Shijakut, dhe aty duken efektivët e policisë që e arrestojnë. Fillimisht Hajri reziston por më pas shtrihet përtokë nga policia, raporton abcnews.al.

Pavarsisht arrestimit vetëm disa orë me vone me ndërhyrje nga lart në rrethana të pasqaruara policia e Durresit është detyruar ta lërë të lirë… Ky është arrestimi i parë dhe i fundit i Altin Hajrit nga policia, edhe gjatë operacionit të fundit të Reneas në kompleksin “Gold” në Shijak ai i shpëtoi arrestimit. /abcnews.al

 

janprenga.jpg
Autor E14:09 | 28/01/2020

Policia ka konfirmuar tashmë vdekjen e Jan Prengës që u mor peng më datë 17 janar në Kamzë. Pas futjes në makinë ai është rrahur dhe goditur duke bërë që të humbasë jetën.

Gazetari i Abc News Andi Qosja raportoi nga Kamza, pranë shtëpisë së viktimë duke theksuar se tashmë aty kanë shkuar të afërm të tyre pasi kanë mësuar lajmin e keq.

Viktima, Jan Prenga

Edhe pse është konfirmuar vdekja e tij, grupi hetimor nuk ka gjetur trupin e viktimës ç’ka pengon vijimin e hetimeve dhe ngritjen e një akuze për vrasje për të ndaluarit, raporton abcnews.al.

Prokuroria e ka të qartë tashme se çfarë ka ndodhur me Prengën pasi ka ndaluar edhe katër persona.

Jan Prenga u mor peng më 17 janar për shkak të prishjes së pazareve të drogës duke synuar marrjen e një shume parash, por gjithçka shkoi keq dhe ai u vdiq në dorë pengmarrësve.

Policia ka ndaluar për këtë krim Leonard Hajrin, Bujar Hajrin, Elton Hajrin dhe Olsi Turjen gjatë operacionit të djeshëm tek kompleksi “Golden” në Shijak.

Dy vëllezërit e Jan Prengës jetojnë në Britaninë e Madhe, ku njëri është i dënuar me tetë vite burg. /abcnews.al

227386_3.jpg
ger ta10:45 | 28/01/2020

Bajram Hajri, Olsi Turja dhe Elton Hajri janë tre personat të cilët janë arrestuar për pengmarrjen e Jan Prengës. Po ashtu në kërkim është shpallur Leonard Hajri ndërkohë janë nën hetim dhe 6 persona të tjerë si të përfshirë në këtë ngjarje.

RENEA rrethoi dje kompleksin “Golden” në Shijak pasi dyshohej se aty mbahej peng 49 vjeçari Jan Prenga që u rrëmbye disa ditë më parë në Kamzë.

Kompleksi i përket vëllezërve Emiljano dhe Altin Hajri, të cilët janë të arrestuar në Itali për trafik lëndësh narkotike.

Nga hetimet e kryera që prej momentit kur Jan Prenga u rrëmbye në Kamzë, pasi u dhunua nga dy persona të maskuar që e futën me forcë në makinë, dyshohet se ngjarja lidhet me një sasi prej 60 kg kokainë.

Sipas Policisë, kjo sasi ishte marrë në dorëzim nga njëri prej vëllezërve të Prengës, i cili për shkak se u arrestua në Londër, në vitin 2017, nuk arriti t’ua dorëzonte personave që ia kishin besuar.

Ndërkohë, Altin Hajri, një emër mjaft i njohur për drejtësinë shqiptare dhe amerikane, nuk u arrit të gjendej, duke u shpallur në kërkim.

Një operacion ndërkombëtar i Drejtorisë së Antidrogës shqiptare dhe asaj italiane, në bashkëpunim me Guardia di Financa u finalizua në orët e para të mëngjesit të 28 tetorit 2015, ku  askokohe u arrestuan 16 persona.

Bilanci i këtij aksioni fliste për mbi 500 kilogramë drogë të sekuestruar, nga të cilat 206 kg heroinë, si dhe 10 milionë euro pasuri të sekuestruara, që dyshohej se ishin ndërtuar me të ardhura nga kjo veprimtari.

Dy vëllezërit Altin dhe Emiljan Hajri, nga Shijaku, u dyshuan në atë kohë se drejtonin trafikun e heroinës që nga vendi ku sigurohej në Afganistan, duke u blerë më pas në Turqi e kaluar tranzit në Shqipëri me destinacion Italinë.

Vëllezërit shqiptarë kanë drejtuar grupin në një mënyrë të ngjashme me ato të organizatave mafioze. Vëllai i madh, Altini, nuk kishte asnjë kontakt me pjesën tjetër të rrjetit. Kështu në rast se njëra qelizë zbulohej, tjetra vazhdonte punën, pa rënë në gjurmët e Policisë.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono