Është arrestuar në Tiranë, Florian Gega, një nga personat e përfshirë në konfliktin e Mamurrasit ku një polic plagosi me armë dy kolegë të tij dhe Nikollë Fufin pas një përplasje të mëparshme mes tyre. Në zonë Florian Gega, njihet si një nga “të fortët”, ndërsa raportohet se ka qenë pjesëmarrës në sherrin me efektivët e policës të ndodhur më 13 prill.
Por si ndodhi përplasja në Mamurras?
Mësohet se mëngjesin e 13 prillit, është shoqëruar për në komisariat pas një kontrolli në lokalin e tij, Nikoll Fufi (Vorfi).
Më pas, rreth orës 13:50, kur punonjësit e policisë kishin ndërruar turnet e shërbimit, dy vëllezërit Fufi i kanë dalë përpara punonjësve të policisë me qëllim goditjen me mjete të forta.
Sipas SHÇBA tre personat goditën me sende të forta, punonjësin e policisë David Madani, i cili në kushtet e vetëmbrotjes ka nxjerrë armën e shërbimit dhe pasi i ka paralajmëruar ata, ka përdorur armën, në fillim duke gjuajtur në ajër dhe pastaj nga goditja me sende të forta e shtetasve, ka kryer qitje të pakontrolluar duke plagosur shtetasin Nikoll Vorfi si dhe dy kolegët e tij, punonjësit e policisë Ilir Zekaj dhe Flamur Lleja. Të plagosurit janë jashtë rrezikut për jetën dhe ndodhen në spital për kurim të mëtejshëm.
Siç shpjegon SHÇBA polici i arrestuar akuzohet për veprat penale “Plagosje e rëndë në kapërcim të kufijve të mbrojtjes së nevojshme” dhe “Plagosje e rëndë nga pakujdesia”.
Lidhur me këtë janë arrestuar katër persona si të përfshirë. I arrestuar është edhe polici i patrullës në Mamurras David Madani , i cili qëlloi me armë duke lënë të plagosur dy kolegët e tij dhe personin tjetër të përfshirë në konflikt. Gjithashtu të arrestuar në lidhje me këtë ngjarje janë edhe Gjon Fufi, Rudolf Fufi dhe Nikoll Fufi (Vorfi) i cili mbeti i plagosur me sende të forta në vendin e ngjarjes./abcnews.al/
