Një shifër mesatare marramendëse kanë ofruar 6 kompanitë e para që i janë përgjigjur Komisionit Qendror të Zgjedhjeve për të sjellë pajisjet përmes të cilëve do të bëhet identifikimi biometrik i votuesve.
Siç raporton gazetarja e “ABC” Esiona Konomi, sipas të dhënave të siguruara, kompanitë kanë ofruar shifra të larta, që përfshijnë ofrimin e shërbimit, instalimin e pajisjeve që do blihen nga KQZ, si dhe trajnimin e komisionerëve.
Oferta më e ulët është shënuar nga kompania e vetme shqiptare e përfshirë në vlerësimin e ofertave.
TCN kërkon 14 milionë euro për dhënien e pajisjeve me qera, dhe 17 milionë euro nëse KQZ do t’i blejë pajisjet.
5 kompanitë e tjera janë të huaja. Për shitjen e pajisjeve, trajnimin dhe shërbimin ato kërkojnë: 15 milionë euro (dy kompani), 24 milionë euro, 20 milionë dollarë dhe 28 milionë dollarë që është shifra më e lartë.
KQZ pret përgjigje dhe nga 14 kompani të tjera, për të nxjerrë një kosto mesatare, të cilën do ja dërgojë qeverisë për financim.
Identifikimi biometrik i votuesve, është një kërkesë e opozitës në Këshillin Politik, që u vendos në Kodin Zgjedhor në marrëveshjen e 5 qershorit.
Ajo synon eleminimin e votës familjare apo votimit në emër të dikujt tjetër.
Kompanitë që janë përgjigjur KQZ-së deri më tani, janë: CGTS, TCN, CIELA, DERMAOLOG IDENTIFiCATION SYSTEM GmbH, SMARTMATIC WORLDWIDE HEADQUARTERS, THALES GROUP.
n.d/abcnews.al
