Ushtarët janë vendosur në rrugë në disa qytete në Ekuador, ndërsa vendi po kalon nga ditët e dhunës të paprecedentë ndonjëherë. Persona të armatosur e të maskuar sulmuan një studio televizive publike gjatë një transmetimi të drejtpërdrejtë në qytetin e Guayaquil dhe bomba u shpërthyen në të gjithë Ekuadorin të martën. Më shumë se 130 punonjës të burgjeve po mbahen peng nga të burgosurit në pesë burgje.
Një gjendje e jashtëzakonshme 60-ditore filloi të hënën pasi një nga kriminelët më famëkeq u arratis nga qelia e burgut. Është e paqartë nëse sulmi në studion televizive në qytetin më të madh të Ekuadorit lidhej me arratisjen e bosit të bandës Los Choneros, Adolfo Macías Villamar, i njohur si Fito.
Presidenti Daniel Noboa shpalli gjendjen e jashtëzakonshme si përgjigje ndaj një vale të trazirave të fundit në burg e arratisjeve nga burgjet dhe akteve të tjera të dhunës për të cilat autoritetet fajësojnë bandat kriminale.
Ai urdhëroi që bandat kriminale të “neutralizoheshin” dhe ka thënë se një “konflikt i brendshëm i armatosur” ekzistonte brenda vendit. Qeveria thotë se dhuna është një reagim ndaj planit të presidentit Noboa për të ndërtuar një burg të ri të sigurisë së lartë për krerët e bandave.
Presidenti ka thënë të mërkurën se Ekuadori do të fillojë të dëbojë të burgosurit e huaj, veçanërisht kolumbianët, për të zvogëluar numrin e të burgosurve. Ndërkohë, Këshilltari i Sigurisë Kombëtare i Shtëpisë së Bardhë, Jake Sullivan ka thënë se SHBA-ja “i dënon fuqishëm” sulmet e fundit.
Disa orë pas sulmeve, Guayaquil është si një qytet që zgjohet nga një makth i çuditshëm. Pavarësisht nga përkeqësimi i situatës së sigurisë gjatë viteve të fundit, pakkush mund të priste ta shihte spikerin e kanalit televiziv shtetëror “TC” me një armë të drejtuar në kokë, drejtpërdrejt në transmetim.
Policia ka bërë 70 arrestime që nga e hëna, duke përfshirë edhe për sulmin ndaj stacionit televiziv.
Rrugët janë kryesisht bosh që nga e marta. Qindra ushtarë, përfshirë tanke, po patrullojnë rrugët e Guayaquil dhe kryeqytetit, Quito.
Në të gjithë vendin, shkollat kanë mbetur të mbyllura, me mësimet që zhvillohen online. Kina, një investitor i madh në Ekuador, gjithashtu njoftoi se po mbyllte përkohësisht ambasadat dhe konsullatat e saj.
Brenda bizneseve që mbeten të hapura në Guayaquil, rojet e sigurisë private po i mbajnë dyert të mbyllura, vetëm duke i lejuar njerëzit të hyjnë me kujdes.
Eduardo, i cili punon për një kompani ndërkombëtare veshjesh, ka thënë se ishte në rrugë duke blerë kafe në momentin që kaosi filloi të shpërthejë dhe në momentin që ai u kthye në zyrë, kolegët e tij kishin filluar të grumbullonin gjërat dhe të largoheshin.
“Sot, të gjithë po punojnë nga shtëpia”, ka thënë ai.
Rreth 125 roje burgu dhe 14 pjesëtarë të stafit administrativ po mbahen peng në të gjithë Ekuadorin, thotë agjencia e burgjeve SNAI.
Katër oficerë policie, për të cilët autoritetet thonë se u rrëmbyen nga kriminelët mes të hënës dhe të martës, gjithashtu po mbahen pengë. Tre oficerë të tjerë u liruan vonë të martën.
Policia thotë se dhuna po vazhdon në Guayaquil. Tetë persona u vranë dhe tre u plagosën në sulmet e lidhura me bandat kriminale në qytet të martën, ndërsa dy oficerë policie u vranë nga “kriminelët e armatosur” në qytetin e afërt të Nobolit.
Policia thotë se është në proces identifikimin e tre trupave të cilët u gjetën në një veturë të djegur në jug të qytetit gjatë natës.
Kjo është një situatë e paprecedentë për njerëzit e Guayaquilit – ata kanë parë protesta politike dhe incidente të tjera të dhunshme gjatë viteve, por asgjë në shkallën e panikut të plotë që përfshiu qytetin të martën.
Studentët vrapuan nga frika ndërsa persona të armatosur hynë në korridoret e universitetit dhe bomba u shpërthyen në të gjithë vendin, duke rritur frikën se sulmet ishin të koordinuara.
Ata që duhet të dalin jashtë, për punë ose për të vizituar familjen, po e bëjnë këtë me shumë frikë. Ka qenë një 24 orë rraskapitëse, shqetësuese në portin kryesor të Ekuadorit – thonë banorët.
