Ekstradohet nga Italia, një prej personave të shpallur në kërkim gjatë mega operacionit të koduar “One If-By Land”, në kuadër të goditjes së kontrabandimit të personave me qëllim emigrimin drejt SHBA-së, Kanadasë dhe Mbretërisë së Bashkuar.
Nga specialistët e Interpol Tirana, u bë ekstradimi nga Milano/Itali i Emiljano Sinjarit, 27 vjeç, banues në Durrës. 27-vjeçari ishte shpallur në kërkim ndërkombëtar, në bazë të vendimit penal të vitit 2018, të Gjykatës së Shkallës së Parë të Krimeve të Rënda Tiranë, e cila ka caktuar masën e sigurisë “Arrest në burg”, për veprën penale “Ndihma për kalim të paligjshëm të kufijve”, kryer në formën e grupit të strukturuar kriminal.
Gjatë periudhës 2016-2017, 27-vjeçari nga Durrësi në bashkëpunim me persona te tjerë, në kuadër të grupit të strukturuar kriminal, ka kryer kontrabandim të shtetasve shqiptare drejt SHBA-së, Mbretërisë së Bashkuar dhe Kanadasë, me karta identiteti të falsifikuara, kundrejt pagesës deri në 25 000 dollarë./ABC News Albania 24/7
