Eksperti gjerman i migracionit Gerald Knaus tha këtë të hënë se, në rast se Rusia fiton luftën, mund të pritet ardhja e disa milionë refugjatëve ukrainas në Evropë.
“Ata që aktualisht hezitojnë të ndihmojnë Ukrainën nuk janë të vetëdijshëm se çfarë është në rrezik. Nëse Ukraina e humbet këtë luftë, do të pasojë një valë e madhe refugjatësh, të tillë si Evropa që nuk i ka parë që nga vitet 1940”, tha Knaus në një intervistë për rrjetin mediatik RND.
Ai shtoi se tashmë ka dhjetë milionë persona të zhvendosur brenda vendit në Ukrainë, të cilët për momentin nuk duan të largohen nga vendi me shpresën se Kievi do të fitojë dhe se do të mund të kthehen në shtëpitë e tyre.
“Por nëse shpresa për kthim zhduket, kjo mund të shkaktojë lëvizje të reja masive të refugjatëve drejt Perëndimit”, përfundoi drejtori i Iniciativës Evropiane për Stabilizim. Ai shtoi se nga 4.2 milionë ukrainas në Bashkimin Evropian, rreth 1.2 milionë janë në Gjermani.
“Duke marrë parasysh numrin e banorëve, më pak në Poloni, Republikën Çeke apo Bullgari, por shumë më tepër se në Francë”, tha Knaus. Muajt e fundit në Gjermani është diskutuar për privilegjet që kanë refugjatët nga Ukraina që në ditën e parë të hyrjes në atë vend, të cilat refugjatët nga vendet e tjera nuk i kanë./abcnews.al
