ABC mëson detaje të reja nga aksidenti i frikshëm që ndodhi mbrëmjen e sotme në rrugën “Xhanfize Keko” në zonën e Kinostudios në Tiranë, ku një “Benz” luksoz me targa AA 888 XX i drejtuar nga një adoleshent 19-vjeç, Jehon Breçani doli nga rruga si pasojë e shpejtësisë duke përplasur një vajzë, që po ecte në trotuar. ABC siguroi pamjet e aksidentit të frikshëm.
Sipas burimeve nga spitali, vajza 23-vjeçe Xhesina Gega ka humbur njërën nga këmbët nga goditja e “Benz”-it që e mori përpara me shpejtësi rrufe. E plagosura është futur në sallën e operacionit dhe ndodhet në gjendje të rëndë për jetën.
Pasi aksidentoi vajzën, makina e drejtuar nga i riu që nuk kishte konsumuar alkool mori përpara çfarë i doli duke u përplasur me një zyrë noterie dhe këputur një pemë. Të terrorizuar dhe me duart në kokë nga ajo që u panë sytë, qytetarët shprehen se “vajza ishte në rrugën e vet dhe tani mbeti pa këmbë e shkreta”.
Kalimtarët e rastit i dhanë ndihmën e parë të plagosurës, e cila ndodhet në spital në gjendje të rëndë për jetën. Drejtuesi i mjetit u shoqërua në ambientet e Komisariatit nr.4, për veprime të mëtejshme hetimore.
Grupi hetimor ndodhen në vendngjarje dhe sipas policisë po punon për sqarimin e rrethanave të ngjarjes. d.b/Abcnews.al
