Maurizio Sarri do të jetë trajneri i ri i Lazios, që gjen pasuesin e Simone Inzaghit. Dyshja Lotito-Tare kanë pasur një takim të gjatë me Fali Ramadanin, agjentin e trajnerit italian. Akordi është arritur, teksa pritet vetëm zyrtarizimi.
62-vjeçari do të firmosë një kontratë 2-vjeçare. Rroga sezonale do të jetë 3 milion euro, që bashkë me bonuse mund të arrijë shifrën e 4 milion eurove. Lazio do të jetë ekipi i katërt që drejton Sarri në Serie A pas Empolit, Napolit dhe Juventusit.
Tratativa të gjata janë zhvilluar mes palëve. Shumë klauzola janë përfshirë në marrëveshjen e arritur, që prej bonuseve të fitoreve, kualifikimin në Champions apo Europa League, apo edhe përfitimet që do të vijnë nëse bardhekaltrit fitojnë Serie A.
Sarri ka qenë në kontakt të ngushtë me Ramadanin gjatë gjithë kohës që ky i fundit po bisedonte me presidentin dhe drejtorin sportiv të klubit kryeqytetas. Lazio e re do të luajë me skemën 4-3-3. Biseda janë kryer edhe në lidhje me merkaton. Kushti kryesor i trajnerit është qëndrimi i yjeve si Immobile, Luis Alberto dhe Milinkovic-Savic.
Drejtuesit e Lazios e kanë siguruar Sarrin për një gjë të tillë, teksa do të ketë edhe përforcime nga merkato. Trajneri do të punojë me një staf të ngushtë prej 4-5 personash, që do të udhëhiqen nga Giovanni Martusciello, zëvendësi i tij historik. /abcnews.al
