Elvana Gjata është një ndër këngëtaret më të dashura të publikut, e cila gjithmonë tërheq vëmendje. Pas 3 vitesh mungesë, ajo më në fund është rikthyer në një studio televizive për të dhënë një intervistë ekskluzive në Soiree, për albumin e saj më të fundit “Çelu”, por edhe detaje përtej jetës artistike.
Në një intervistë për Jonida Shehun në ABC, Elvana Gjata ka folur edhe për kryefjalën e kohëve të fundit, siç është kovidi. Këngëtarja zbuloi se ende ajo nuk është infektuar, por prindërit e saj po dhe për të ka qenë makthi i saj më i madh.
“Kovidin se kam kaluar ende. Kam kaluar sigurisht një periudhë shumë të vështirë mund të them me bindje që më ka ndryshuar shumë, sepse unë jam një njeri modest, me këmbë në tokë, por kjo periudhë më ka bërë që të jem edhe më shumë dhe t’i vlerësoj e t’i dua edhe më shumë gjërat e vogla. I jam përkushtuar totalisht familjes. Kam kaluar shumë kohë me ta dhe është diçka që do ta bëj edhe më shumë e nuk do ndalem edhe pse gjërat duken sikur po rikthehen në normalitet. Familja për mua është gjëja më e rëndësishme që unë kam. Në fakt as motra nuk e ka kaluar, prindërit po dhe ky ishte makthi më i madh që mund të përjetoja. Që kur dëgjuam për pandeminë në fillim, frika ime më e madhe ishte sigurisht ata. Ditën kur mora vesh që ata ishin infektuar, ishte shumë e rëndë. Lavdi Zotit nuk e kaluan aq rëndë saç prisja. Konkluzioni është që ata sot janë mirë. I dua shumë ata. Janë pika ime e dobët”, ka treguar Elvana Gjata.
Edhe pse ka qenë e vështirë për të, ajo ka treguar se nuk është ndaluar në asnjë moment së krijuari muzikë, ama është detyruar të këndojë me maskë.
“Mua më është dashur që të bëj muzikë, të krijoj muzikë me maskë. Kam qenë e detyruar të këndoj me maskë. Kam kënduar më maskë në studio sepse nuk kam qenë vetëm dhe ka qenë një situatë vërtet shumë e çuditshme, e vështirë. Duhej të përshtateshe patjetër me këtë gjë, por ia dola që ta përballoj këtë situatë me sukses. Me gjithë vështirësitë që kisha, nuk doja që të dilja nga fokusi dhe fokusi im ishte të vazhdoja e të zhvilloja këtë trashëgimi time muzikore që unë doja të sillja në këtë album”, është shprehur Elvana Gjata. /abcnews.al
