Tottenham fitoi 1-3 në fushën e Sheffield United ditën e sotme. Një sukses i rëndësishëm për ekipin e Jose Mourinhos, që është ngjitur në vend të pestë me 33 pikë. Distanca me kreun është ulur në 4 pikë pas barazimit pa gola në përballjen Liverpool-United.
Trajneri i skuadrës londinez, Jose Mourinho analizoi për mediat fitoren në transfertë. “Special One” vlerëson lojën e skuadrës së tij, teksa thekson se duhet të kishin shënuar më shumë gola me rastet e krijuara përballë ekipit të vendit të fundit në Premier League.
“Sheffield është një skuadër që i pëlqen të dominojë, të vërë në vështirësi kundërshtarin dhe të sulmojë shumë nga krahët, por ne ia dolëm t’i mbanim larg portës tonë. Bëmë shumë presing, luajtëm me mbrojtje lart dhe u treguam të aftë për ta fituar takimin.
Për mua, personalitet perfekt do të thotë që skuadra ime të mbyllë pjesën e parë me rezultatin 4-0, të finalizojë me gola të gjithë rastet e krijuara dhe të ‘vrasë’ ndeshjen. Më duhet të them se luajtëm shumë mirë. Dominuan ndeshjen dhe duhet të shënonim më shumë në pjesën e parë“, deklaroi Mourinho. /abcnews.al
