Një dron ukrainas hyri në një bazë ajrore brenda territorit rus dhe shkatërroi një bombarduese supersonike ruse.
Rusia pranoi se një dron me katërkopter u godit me armë zjarri dhe u shkatërrua. Zjarri i shkaktuar nga droni u shua shpejt dhe askush nuk u lëndua, tha Rusia.
Ukraina nuk dha asnjë koment për sulmin.
BBC raporton se është një Tupolev Tu-22 që po digjet në bazën ajrore Solchi-2 që ndodhet në jug të Shën Petersburgut, 650 km nga kufiri me Ukrainën.
Fotot e postuara në Telegram tregojnë se ka ndodhur diçka më e rëndë sesa e pranon njoftimi i palës ruse.
Tu-22 mund të fluturojnë me dyfishin e shpejtësisë së zërit (2300 kilometra në orë) dhe të mbajnë deri në 24 tonë bomba ose raketa. Ato janë përdorur nga Rusia, e cila ka rreth 60 avionë të tipit, për sulme kundër Ukrainës.
Edhe pse sulmi nuk ka shumë ndikim në forcat e armatosura ruse, ai ka një kuptim të fortë simbolik, pasi tregon se Ukraina është në gjendje të godasë thellë në territorin rus.
Kievi ka kryer dhjetëra sulme brenda Rusisë, përfshirë në Moskë, duke shkaktuar zakonisht dëme të kufizuara. Përshkrimi i Rusisë se droni ishte një katërkopter (ndoshta komercial) tregon se sulmi u krye nga një distancë e shkurtër, pra nga një grup që lëvizte brenda territorit rus.
