Kryebashkiaku i Gramshit Klodian Taçe ka fshehur hetimin e vitit 2009 nga prokuroria e Tiranës, ku ai është kallëzuar penalisht nga recepsionistja e një qendre private shëndetësore e cila e ka akuzuar për vjedhjen e 68 mijë lekëve të reja.
Kështu Taçe preket nga ligji për dekriminalizimin, ku sanksionohet qartë se edhe në rast të fshehjes së hetimit e jo vetëm dënimit, kryebashkiaku humbet mandatin.
Klodian Tace, i zgjedhuri i Partisë Socialiste në Gramsh, ka fshehur në formularin e dekriminalizimit hetimin për vjedhje nga prokuroria e Tiranës në vitin 2009.
Siç raporton gazetari Aldo Kozarja për abcnews.al, megjithëse Taçe nuk është dënuar për vjedhje, ai ka qenë nën hetim, dhe këtë fakt e ka fshehur në formularin e dekriminalizimit.
ABC News ka siguruar materialin e plotë hetimor të prokurorisë ku Tace rezulton i pafajshëm për akuzën në fjalë.
Është kjo dosje që në bazë të ligjit për dekriminalizimin, rrezikon mandatin e Taçes, njësoj si Agim Kajmakut, Valdrin Pjetrit dhe kryebashkiakëve të tjerë që janë prekur nga ligji dhe kanë lënë mandatin.
/abcnews.al
