Juventusi luan nesër një ndeshje të rëndësishme ndaj Lazios për javën e 26 të Serie A. Bardhezinjtë e kanë të ndaluar të gabojnë tashmë për të synuar titullin dhe këtë e shprehu edhe Pirlo në konferencën e sotme për mediet. Trajneri foli edhe për dëmtimet dhe objektivat e Juventusit.
“Lazio është ekip i shkëlqyer që ka luajtur së bashku për disa vjet. Ata kanë lojë të mirëpërcaktuar dhe rezultatet flasin për to. E dimë se do përballemi me një ekip, që do të luftojë për të arritur në majë. Po e përgatisim ndeshjen në mënyrën më të mirë të mundshme, duke ditur karakteristikat e tyre dhe e dimë se nuk do të jetë e lehtë.
Të gjitha ndeshjet janë vendimtare për Juventusin. E tashmja është ndeshja e nesërme, ne do të përqendrohemi me të gjitha forcat tona për të fituar dhe pas kësaj do mendojmë vetëm për Porton. Këtë mëngjes, disa nga lojtarët e dëmtuar janë stërvitur pjesërisht me ekipin, ne kemi ende një ditë për të rikuperuar ndonjërin prej tyre.
Është për të ardhur keq që Bentancur mungon, do duhet të shpikim diçka për të vendosur formacionin më të mirë në fushë. Kur luan shumë ndeshje, një ose dy ditë pushim është mirë. Kjo vlen edhe për Cristianon. Tani që jemi pak përpara fundit të sezonit, ai ka shtrënguar dhëmbët dhe do ta bëjë për aq kohë sa kemi nevojë. Ai ka treguar dhe vazhdon të demonstrojë profesionalizmin e tij të madh.
Ndeshjet janë të gjitha të rëndësishme, ndeshja e nesërme është gjithashtu e rëndësishme për ecurinë në kampionat. Po kalojmë një periudhë ndeshjesh të vështira dhe të rëndësishme, kështu që entuziazmi nuk mungon. Dhe gjithmonë do të jetë aty.
Në renditje, situata është e njëjtë me javën e kaluar. Ne duhet të jemi të gatshëm të mos bëjmë gabime në rast se bëjnë ato më lart. Ne po luftojmë në të gjitha frontet dhe për sa kohë që ka shpresë, ne do të duhet të japim gjithçka që të përpiqemi të fitojmë titullim kampion.
Nëse të tjerët nuk bëjnë asnjë gabim dhe janë më të mirë se ne, do i komplimentojmë ata në fund. Ne filluam një projekt verën e shkuar, gjykimet shpesh ndryshojnë nga ndeshja në ndeshje. Jemi të qetë, ne e dimë se çfarë duhet të bëjmë dhe vazhdojmë përpara.
Duhet të luajmë një ndeshje të zgjuar nesër, duke ditur se jemi në një periudhë delikate dhe nuk jemi në 100%. Do të jetë e rëndësishme të menaxhojmë çdo situatë dhe çdo ndeshje mirë, sepse nuk do të jeni në gjendje të luani në 100% për 90 minuta”, u shpreh Pirlo. /abcnews.al
