Coronavirusi është kthyer në një problem në Itali, aty ku edhe futbollit u ndal për një moment. Së fundmi u vendos të luhet me dyer të mbyllura dhe lojtarët e drejtuesit e klubeve janë pajtuar me diçka të tillë. Mes tyre edhe Berat Djimsiti, futbollisti i kombëtares shqiptare.
Në mediat italiane ai ka treguar porositë që u janë dhënë: “Shpresoj që virusi sa më shpejt të ndalet dhe mos të ketë më viktima. Është një gjendje kaotike, por shpresoj që sa më parë të ndalet. Personalisht nuk kam frikë nga ky virus, por ka persona të tjerë që frikësohen dhe është shumë normale.
Jeta në Bergamo është duke u zhvilluar normalisht, edhe pse jemi këshilluar që sa më pak të dalim nëpër qytet, qendra tregtare apo lokale të ndryshme”.
“Ndoshta është më mirë që po luhet pa tifozë ose që po anulohen ndeshjet, pasi kështu nuk do të infektohen persona të tjerë nga virusi. Natyrisht që dëshira jonë është të luajmë me tifozë, por që ne do t’i zbatojmë urdhrat që kemi. Momentalisht është një gjendje e rëndë, por shpresoj që së shpejti të kalojë”, tha Djimsiti. /abcnews.al
