Disidenti rus Ilya Yashin, i cili është dënuar me tetë vjet e gjysmë burg për denoncimin e sulmit ndaj Ukrainës, është zotuar të vazhdojë luftën e tij kundër Vladimir Putinit, i bindur se presidenti rus urdhëroi vrasjen e Alexei Navalny.
“Për sa kohë që zemra ime rreh, do të luftoj kundër tiranisë. Për sa kohë të jetoj, nuk do të kem frikë nga asnjë e keqe. Për sa kohë të marr frymë, do të jem me njerëzit e mi. Ju betohem”, shkruan Ilya Yassin në një letër, e cila është bërë publike nga të afërmit e tij në rrjetet sociale.
Yashin tha se ishte i bindur se Vladimir Putin urdhëroi vrasjen e Alexei Navalny, mikut të tij të vjetër.
“Ai nuk e vrau vetëm atë. Ai e vrau atë në një mënyrë për t’u dukur. Sidomos para zgjedhjeve (presidenciale ruse), në mënyrë që askush të mos dyshojë në përfshirjen e Putinit”, shtoi ai.
“Në mendjen e Putinit, pushteti shfaqet në këtë mënyrë: me vrasje, brutalitet dhe hakmarrje. Ky mendim nuk është mendimi i një burri shteti. Është mendimi i një kreu bande”, vijoi kreu i opozitës.
Në prill 2023, Ilya Yashin, 40 vjeç, u dënua me tetë vjet e gjysmë burg për raportimin e “vrasjes së civilëve” në qytetin ukrainas të Bucha, afër Kievit.
Në nëntor ai u transferua në një koloni penale në Safonovo, afër Smolensk, në Rusinë perëndimore.
/abcnews.al
