Ishte e qartë se shumë gjëra do të ndodhnin deri në fund. Po ngjajnë pikërisht ato që priteshin me Skënderbeun që po ngjallet javë pas jave dhe po mund ekipet më të forta të kampionatit, si Egnatian e tani Dinamon, e cila e ndihmoi edhe me mënyrën sesi u paraqit në fushë.
Trajneri Ilir Daja bëri pak a shumë të njëjtën gjë siç kolegu I tij Ernest Gjoka.
Në ndeshjen e kaluar të Kupës së Shqipërisë, Skënderbeu u paraqit me të rinjtë dhe kryeqytetasit u kualifikuan me përmbysje 4-0 në Korçë.
Këtë herë, ishte “nëndetësja” që luajti me ekipin U19 dhe u mund thuajse me të njëjtat shifra, 1-4.
Sulmuesi Nasr ishte heroi I korçarëve që shënoi tre nga golat, në minutat 61, 69 e 80, ndërsa Nikaj realizoi në 55’.
Në të vërtetë, ishin miqtë që kaluan në epërsi që në 9’ kur goditi saktë Qardaku, dhe përmbysja ndodhi pas pushimit.
Skënderbeu ka shënuar në Superligë vetëm 11 gola në 15 ndeshje, me përjashtim të sfidave në Ballsh kur fitoi 3-0, dhe tani kundër Dinamos.
Kontraste tepër të forta. Ndërkaq, trajneri Skënder Gega u kthye me fitore tek Partizani.
Sukses tepër I rëndësishëm në “Arenën e Demave”, edhe pse vetëm 1-0.
Shënuesi I golit të vetëm ishte sulmuesi afrikan Eleke, e dyta herë që I jep fitoren të kuqve pas suksesit në Korçë kundër Skënderbeut.
Rrjeta u realizua në 40’, dhe suksesi I ndihmon të kuqtë të jenë më të qetë për vendin e katërt, pra për të qenë në plej of.
Laçi, ndërkaq, zhytet vendin e tretë nga fundi me 32 pikë, një më shumë sesa Tirana e Bylisi, që ende nuk e kanë luajtur ndeshjet e tyre të javës së 32-të.
