Sapo kemi lënë pas Panairin Ndërkombëtar të Tiranës, i organizuar për herë të 30-të nga Klik Ekspo Group, dhe sipas traditës, në këtë panair morën pjesë disa nga kompanitë më të spikatura të tregut shqiptar në industri të ndryshme. Ishte një mundësi e shkëlqyer për bizneset që të shfaqnin avantazhet e tyre konkurruese dhe risitë që kanë sjellë në zhvillim dhe teknologji. E ndërsa po flasim për teknologjinë, ky panair vuri në dukje edhe procesin e vazhdueshëm të dixhitalizimit, një temë e nxehtë në aktualitetin shqiptar, përmes një paneli me shumë figura të shquara nga industria e financave: drejtues nga kompanitë kryesore të fintech, banka dhe institucione të fokusuara në mbrojtjen dhe privatësinë e të dhënave.
Një nga panelet e rëndësishme që u zhvilluar gjatë asaj jave ishte ai i “Sektorit Financiar në Shqipëri: Sfidat e Digjitalizimit”, i cili ndezi mjaft diskutime konstruktive rreth rolit në zhvillim të teknologjisë në sektorin financiar shqiptar.
Një nga pikat kryesore të ngritura ishte rëndësia në rritje e digjitalizimit për t’i bërë shërbimet financiare më të aksesueshme, të sigurta dhe efikase për publikun. Drejtues të rëndësishëm nga institucionet financiare si iute, Tirana Bank apo edhe nga Komisioneri për të Drejtën e Informimit dhe Mbrojtjen e të Dhënave Personale theksuan se sektori financiar dhe ai fintech në Shqipëri po zgjerohet me ritme të shpejta, por që digjitalizimi të jetë vërtet efektiv, bizneset dhe institucionet publike duhet të jenë në një linjë në përpjekjet e tyre. Një qasje e unifikuar ndërmjet sektorit privat dhe atij publik është kritike për të adresuar nevojën urgjente për inovacion brenda sektorit financiar, veçanërisht në ofrimin e zgjidhjeve më miqësore për përdoruesit.
Platformat dixhitale që thjeshtojnë proceset, reduktojnë pengesat burokratike dhe ofrojnë akses të menjëhershëm në shërbime u theksuan si e ardhmja e transaksioneve financiare në Shqipëri. Me rritjen e kërkesës së konsumatorëve për akses të shpejtë dhe të lehtë në shërbimet financiare, fintech-ët që ofrojnë kredi të vogla dhe zgjidhje të tjera financiare dixhitale po bëhen me shpejtësi një pjesë qendrore e ekonomisë shqiptare. Megjithatë, mesazhi ishte i qartë: bizneset, rregullatorët dhe shoqëria duhet të përqafojnë ndryshimin, të investojnë në teknologjinë e duhur dhe të ndërtojnë infrastrukturën e nevojshme për të mbështetur këtë transformim dixhital.
Rritja e kompanive fintech në Shqipëri, edhe pse ende në fazat e para, paraqet një mundësi reale për të revolucionarizuar sektorin financiar. Qytetarët shqiptarë janë gjithnjë e më të frustruar me praktikat e vjetruara, burokratike të financave tradicionale – pritjet e gjata në sportele, grumbujt e dokumenteve dhe radhët e pafundme. E ardhmja e financave në Shqipëri qëndron në dixhitalizimin: në bërjen e shërbimeve financiare më të shpejta, më të thjeshta dhe më të aksesueshme për të gjithë.
Në veçanti, fintech-ët e kredive të vogla po plotësojnë një boshllëk të rëndësishëm në treg duke ofruar kredi të shpejta dhe të aksesueshme pa pasur nevojë për procedura tradicionale bankare. Nëpërmjet aplikacioneve celulare ose platformave online, individët dhe bizneset mund të aksesojnë fondet pothuajse menjëherë, duke eliminuar burokracinë dhe proceset që kërkojnë kohë që kanë rrënuar historikisht sistemin financiar. Kjo nuk është thjesht një çështje komoditeti, por një hap i rëndësishëm drejt përfshirjes financiare për shumë shqiptarë, të cilët prej kohësh nuk janë shërbyer nga bankat konvencionale.
Çelësi për zgjerimin e këtij sektori qëndron në përdorimin e teknologjisë për të përmirësuar proceset. Me infrastrukturën e duhur dixhitale, këto platforma fintech mund të ofrojnë miratime dhe disbursime të menjëhershme, duke i lejuar qytetarët të aksesojnë fondet sa herë që u nevojiten. Kjo është rruga përpara: ofrimi i shërbimeve financiare fleksibël, transparente dhe të arritshme me prekjen e një butoni.
Për më tepër, ndërsa tregtia elektronike vazhdon të rritet në Shqipëri, platformat fintech po integrohen gjithnjë e më shumë me blerjet online, duke u mundësuar konsumatorëve të bëjnë pagesa, të blejnë produkte me kredi apo edhe të kenë akses në kredi të vogla përmes kanaleve dixhitale. Kjo përvojë e pandërprerë po transformon mënyrën se si shqiptarët ndërveprojnë me financat dhe tregtinë dhe do të zgjerohet vetëm në vitet e ardhshme.
Pra, a është gati tregu shqiptar për këtë revolucion teknologjik? Po, pa dyshim. Por është gjithashtu koha për të shkuar përtej llafeve dhe për t’u fokusuar në marrjen e veprimeve konkrete. Sfida kryesore tani është krijimi i një mjedisi rregullator që mbështet këtë transformim, duke zhvilluar infrastrukturën e nevojshme dhe duke siguruar që shërbimet financiare dixhitale të jenë të aksesueshme për të gjithë. Kjo është puna që ka përpara.
Opinion nga Bardhi Sejdarasi
