Qerim Memiko dhe familja e tij nga fshati Ferras i Fierit e kaluan natën në makinë. Sot u kthyen në banesë dhe u përballën me dëmet e shumta të shkaktuara nga përmbytjet. Siç duket nga pamjet në katin e parë të shtëpisë ka ende ujë dhe baltë.
“Kur erdhi uji dje u çmendëm gruan e kam të sëmurë është me diabet i vajti dje 300-350. Shtëpitë ikën mbaruan. Do mundohemi t’i pastrojmë po ku do flemë lagështia. Qeveria është e para dhe bizneset të na ndihmojnë kush të mundet. Shyqyr që doli djelli do ngrohemi po natën ku të flemë. Se të tërë kanë hallet e tyre. të tëra na janë shkatërruar”.
Edhe familje të tjera janë dëmtuar shumë.
“Sado i ngritëm divanët i ka zënë uji….”.
“Me djalin e sëmurë ka fjet këtu në ujë djali shihe. Kam nevojë për ndihëm nga qeveria”.
“U përpoqëm ti ngrinim sendet po prapë i kapi uji. Uji në shtëpi vajti 1 metër e 20 cm. Hyri nga dritaret. Ikëm nëpër gjitonë mbrëmë nëpër shokë. Me të keq”.
“Pompa s’punon, shteti të më hapë kanalin që të ikë uji”.
Banorët e Ferrasit nuk kanë besim se do dëmshpërblehen.
“Jemi përmbytur shumë herë po shteti vetëm një herë na ka dhënë”.
“Në 2015 me ra banesa nga lumi ja ku i kam letrat s’më dha gjë shtetit. E prapë e bëra shtëpinë tani mu përmbyt prapë. Zararin e ka bërë kanali i madh që e bënë përgjysmë. Armando Subashi me hajdutët me paret e shtetit se bëjnë punë saktë. Jemi në gjendje katastrofe. Mbrëmë me plakën fjetëm në soletë lart. Na mbyti kanali I martinës se e lanë për gjysmë”.
“Shpëtuan për gjysëm orë. Na premtuan në 2015 bëmë dokumentat na tallën s’na i dhanë. E lanë kolektorin për 200 metra na thanë do e bëjmë ikën vitet na tallën”.
Drejtori i emergjencave Maksim Zaka bën të ditur se në Qarkun e Fierit janë përmbytur afro 100 banesa, pjesa më e madhe ndodhen në Ferras.
“S’patëm humbje njerëzore kjo është një gjë shumë e mirë. Doli urdhri në mëngjes nga kryetari i Bashkisë dhe janë ngritur grupet e komisioneve që do vlerësojnë dëmet tani do nisim verifikimet”.
Edhe në Novoselë të Vlorës aty ku Vjosa doli nga shtrat uji është tërhequr. Niveli ka shkuar në 6.4 metër nga 8 që ishte mëngjesin e së djelës. Gjithësesi shumë toka bujqësore janë ende nën ujë./abcnews.al
