Drejtori i Policisë së Shtetit, Ardi Veliu gjatë raportimit në mbledhjen online të Komisionit të Sigurisë, tregoi një video të së ëmës së 15-vjeçarit të dhunuar nga policia, që sipas tij tregonte se i mituri vinte nga një familje jo e rregullt.
Në videon e publikuar nga Veliu, e ëma e djalit Zaida Çobo, shihej teksa mbante një pistoletë në dorë.
Pas këtij veprimi të Veliut, lumë reagimesh erdhën nga radhët e opozitës, nga gazetarë, politikanë e qytetarë.
Si kundërpërgjigje ndaj këtyre zërave, ka reaguar drejtori i Përgjithshëm i Policisë së Shtetit Ardi Veliu.
Përmes një deklarate, Veliu thekson se është i keqardhur, që Policia e Shtetit bëhet rregullisht shënjestra e atyre, që kurrë nuk e thanë një fjalë motivuese për të, dhe se sot përsëritet e njëjta gjë.
Veliu kërkon të shfajësohet pas deklaratës së bërë prej tij, për fëmijën që u dhunua nga policia, dhe shprehet se është “personalisht në shënjestër dhe se i vjen keq për deformimin që po i bëhet realitetit të ngjarjes”.
Video-ja në fakt i përket një filmi shqiptar, ku e ëma e djalit luan si aktore.
Kjo e fundit e përgënjeshtroi kryepolicin duke thënë të vërtetën e saj në ekranin e ABC News.
Në reagimin e tij Veliu nuk tërhiqet nga deklarata, kur thotë se “ka bërë një ilustrim të idesë se nuk mundet të fajësohet gjithnjë e vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate” dhe nëse ka krijuar një keqkuptim me komentin e tij, pret që të gjithë ata që e kanë paragjykuar, do të gjejnë arsye për ta pranuar ndjesën.
Deklaratë e Drejtorit të Përgjithshëm të Policisë së Shtetit Ardi Veliu:
“Jam i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të dhe sot përsëri e njëjta gjë.
Ndërkohë që ne jemi organizata më rigoroze në goditjen e fenomeneve brenda vetes, mjafton që një punonjës i ynë të bëjë një gabim dhe megjithëse ndëshkohet në radhë të parë prej nesh, prapëseprapë goditja vijon ndaj Policisë së Shtetit.
Sot unë jam vënë personalisht në shënjestër dhe më vjen keq për deformimin që po i bëhet realitetit të ngjarjes për të cilën fola dhe vetë qasjes sime ndaj saj.
Së pari, fjala ime nuk mund të nxirret nga konteksti siç po bëhet.
Së dyti, kam bërë një ilustrim të idesë se nuk mundet të fajësohet gjithnjë e vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate.
Së treti, kam sqaruar se punonjësi në fjalë është pezulluar dhe ka nisur hetimi disiplinor dhe penal për të.
Së katërti, unë po komunikoja hapur me deputetët, një shqetësim që është i mbarë punonjësve tanë, për demonizimin që i bëhet figurës së Policit të Shtetit dhe nuk doja të thosha më shumë se kaq.
Por në fund dëshiroj t’u them të gjithë atyre që po e gjykojnë me ngut këtë “krim” të radhës, se nëse nuk kam arritur dot ta sqaroj si duhet atë çka kisha qëllim, kjo nuk mjafton për të më gjykuar me qëllim.
Këtë detyrë e kam mbajtur dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona.
Ndjesë nëse kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time!”./abcnews.al
