Kroacia nuk po kalon një moment të mirë. Pas humbjes 4-1 ndaj Portugalisë, nënkampionët e botës pësuan sërish “poker” golash.
Kësaj radhe ndaj Francës në “Stade de France”. Sfida e dytë në Nations League u fitua 4-2 nga vendasit, i njëjti rezultat që u regjistrua edhe në 15 korrikun e vitit 2018, finalen e Botërorit të Rusisë.
Zlatko Dalic ndje hidhërim për këtë rezultat. Djemtë e tij kaluan të parët në avantazh me anë të Lovren, por u ndëshkuan dy herë në minutat e fundit të pjesës së parë. “Zhvilluam 43 minuta fantastike.
Kontrolluam rezultatin, krijuam raste për të shënuar sërish, por më pas ndodhi ajo që ndodhi… Ishin dy minuta përgjumje totale dhe morëm drejtimin e gabuar. Po pësojmë gola shumë lehtësisht.
Duhet t’i korrigjojmë këto gabime nëse duam të jemi kompetitiv në këtë kompeticion, por sidomos në Euro 2021. Gjithsesi, do të jemi më të përgatitur dhe më shumë gati në sfidat e ardhshme”, thekson trajneri kroat në konferencën për shtypin. /abcnews.al
