Mbi 10 milion vajza të tjera mund të detyrohen të martohen që fëmijë para fundit të dekadës për shkak të pandemisë COVID-19, tha në një deklaratë të henën UNICEF.
Agjencia e OKB-së për mirëqenien dhe të drejtat e fëmijëve paralajmëroi se pandemia po kërcënon të zhbëjë progresin gjatë viteve.
“COVID-19 ka përkeqësuar situatën për miliona vajza,” tha shefja Ekzekutive e UNICEF Henrietta Fore në një deklaratë të publikuar në Ditën Ndërkombëtare të Grave.
“Shkollat e mbyllura, izolimi nga miqtë dhe varfëria në rritje kanë shtuar edhe më shumë problemet që bota tashmë po luftonte të shuante,” shtoi ajo.
Para krizës globale të shëndetit, UNICEF vlerësoi se 100 milion vajza rrezikonin të martoheshin që fëmijë në disa vende. Gjatë 10 viteve të mëparshme, përqindja e vajzave të martuara që fëmijë ishte ulur me 15 përqind – ekuivalenti i 25 milion martesave të shmangura.
Por rritja e parashikuar prej 10 përqind e nxitur nga pandemia do të thotë se “fitorja tani është nën kërcënim”. Rreth 650 milion vajza dhe gra janë martuar që fëmijë dhe gjysma e këtyre martesave kanë ndodhur në Bangladesh, Brazil, Etiopi, Indi dhe Nigeri.
Vajzat që martohen në fëmijëri kanë më pak të ngjarë të qëndrojnë në shkollë dhe më shumë të ngjarë të përjetojnë dhunë në familje, tha UNICEF. Martesat e fëmijëve gjithashtu rrisin rrezikun e shtatzënisë së hershme dhe të paplanifikuar dhe nga ana tjetër, rrezikun e ndërlikimeve të nënave dhe vdekshmërisë. Izolimi nga miqtë dhe familja gjithashtu mund të sjellë një dëm të rëndë në shëndetin mendor dhe mirëqenien e vajzave.
UNICEF theksoi se ndërsa “martesa ndryshon rrënjësisht rrjedhën e jetës së vajzave, efekti i plotë i pandemisë do të vazhdojë të ekzistojë gjatë një brezi”.
“Duke rihapur shkollat, duke zbatuar ligje dhe politika efektive, duke siguruar akses në shërbimet shëndetësore dhe sociale – përfshirë shërbimet e shëndetit seksual dhe riprodhues – dhe duke siguruar masa gjithëpërfshirëse të mbrojtjes sociale për familjet, ne mund të zvogëlojmë ndjeshëm rrezikun e vjedhjes së fëmijërisë së një vajze përmes martesës së fëmijëve , “vazhdoi ajo./abcnews.al
