Pamjet nga fillimi i Pranverës në Miami të Floridas e paraqesin mjaft të zbehtë situatën problematike të covid-19, ndërkohë që virusi vdekjeprurës vazhdon të qarkullojë me ritme të shpejta.
Sipas të dhënave të Universitetit John Hopkins javën e kaluar në SHBA janë regjistruar mesatarisht rreth 1.000 të vdekur në ditë nga koronavirusi.
Ndërkohë që vizitorë nga i gjithë vendi kanë frekuentuar disa nga plazhet më të njohura të Floridas, duke nisur turizmin pranveror me mbushjen e bareve dhe restoranteve edhe në orët e vona të natës.
Për të menaxhuar disi turmat e pabindura që nuk i kanë respektuar rregullat për situatën e Covid, policia javën e kaluar ka arrestuar rreth 100 persona në Miami Beach.
Të Shtunën, Kryebashkiaku i Miamit Dan Gelber shpalli gjendjen e jashtëzakonshme, duke shtuar masat shtrënguese, për shkak të fluksit të njerëzve të shtuar ndjeshëm kohët e fundit, i papërballueshëm për qytetin në situatën e pandemisë.
Shefi i Policisë në Miami Beach ka specifikuar se vizitorët javët e fundit janë shumëfishuar dhe se një trend i tillë po bëhet gjithnjë e më i vështirë për t’u kontrolluar, nëse masat nuk shtrëngohen. /abcnews.al
