Interi e harroi humbjen ndaj Real Madrid në Champions League dhe sot arriti një fitore të bukur dhe të rëndësishme në Serie A. Djemtë e Antonio Contes triumfuan 0-3 në fushën e Sassuolos, kundër një kundërshtari që nuk kishte pësuar akoma humbje deri sot.
“Gjithmonë tentojmë të marrim maksimumin, por nuk ia dalim në çdo rast. Gjëja më e rëndësishme është të dalim nga fusha me fanellat e lagura me djersë. Nuk kam ndryshuar asgjë në kokat e lojtarëve këto ditë“, deklaron trajneri i Interit pas ndeshjes. Conte vazhdon edhe më tej, duke u futur në analizë teknike.
“E kishim përgatitur mirë ndeshjen, sigurisht duke respektuar edhe Sassuolon. Barella luajti për herë të parë përpara mbrojtjes. Ky i sotmi është rezultati më i mirë i sezonit, edhe pse kemi dhuruar paraqitje shumë të mira edhe në takime të tjera.
Nuk kishim shumë kohë, por e studiuam mirë kundërshtarin. Këto ditë është krijuar shumë energji negative ndaj Interit, por ne duhet të vazhdojmë të punojmë fort. Ka njerëz që mezi presin ta na baltosin. Kam stërvitur shumë skuadra, por nuk kam parë kurrë kaq negativitet sa këtu.
Përgjegjësitë duhet të ndahen gjithmonë. Në rezultatet pozitive është e drejtë të ndahen meritat, por kur gjërat nuk ecin mirë nuk mund të kritikohen vetëm trajneri dhe futbollistët“, përfundon Antonio Conte. /abcnews.al
