Interi shfaqi dëshirë të madhe dhe guxoi për të fituar, por për t’ia dalë kundër armatës bardhezi është një mision tepër i komplikuar. Juventusi i Sarrit fitoi 1-2 në San Siro dhe parakaloi zikaltrit në krye të Serie A.
Antonio Conte nuk fshihet dhe tregon realitetin në prononcimin e dhënë pas ndeshjes. Trajneri i Interit vlerëson forcën, kualitetin dhe eksperiencën e kampionëve në fuqi, si dhe pranon diferencat mes dy ekipeve.
Ekipi i tij i pëlqeu, por Juventusi është një kategori tjetër. Dëmtimi i Sensit penalizoi zikaltrit, të cilët e morën vetën në pjesën e dytë, por Higuain gjeti golin e fitores dhe dërgoi ekipin e tij në krye të renditjes.
DUELI – “Juventusi i përket një kategorie tjetër në të gjitha aspektet. Nuk mund të krahasohemi me ta, ekziston një diferencë e frikshme mes nesh. Fituam gjashtë ndeshjet e para duke e dërguar ‘makinën’ në 200 km/h dhe tani duhet të përsërisim të njëjtën gjë. Mund të bënim diçka më shumë në pasimin e fundit, por statistikat konfirmojnë se luajtëm futbollin tonë dhe u përballëm me Juven.”
ANALIZA – “Dëmtimi i Sensit na prishi punë, por e balancuam ndeshjen në pjesën e dytë. Mund të shënonin të dy ekipet. E bënë ata, duke shpalosur gjithë artilerinë e rëndë që kanë. Nuk kam asnjë vërejtje për ekipin tim, përballja ishte e ekuilibruar në përgjithësi. Kemi shumë punë për të bërë në aspektin e menaxhimit të ndeshjes dhe eksperiencës, në ndryshim nga Juventusi që është një skuadër e madhe.” /abcnews.al
