Goli i Danilo D’Ambrosio i dhuroi fitoren Interit përballë Lazio, por në kampin zikaltër nuk ka kohë për festë. Ekipi i Antonio Contes kryeson me 15 pikë të plota dhe nesër në orën 18:00 do të luajë përballë Sampdorias në transfertë.
Synimi i Interit është të arrijë fitoren e gjashtë rresht në kampionat dhe të vazhdojë kryesimin e Serie A. Trajneri leçez ka prekur disa tema në konferencën e tij për shtyp përballë ekipit dorian.
Conte tenton të mbajë ekipin me këmbë në tokë dhe pranon se Juventusi dhe Napoli janë një hap sipër përpara Interit.
SAMPDORIA – “Të luash në Marassi nuk është kurrë e thjeshtë, sepse është një fushë e vështirë. Ata kanë një ekip të mirë, të organizuar dhe drejtohen nga një trajneri i aftë. Ata e kanë ndryshuar sistemin e lojës me të cilin nisën kampionatin dhe duhet të tregohemi shumë të kujdesshëm.”
KRYESIMI – “Askush nuk niset për të humbur. Jemi të lumtur me punën që po bëjmë, por duhet të përmirësohemi për t’i dhënë vazhdimësi rezultateve pozitive. Nëse duam të jemi protagonistë, duhet të shmangim ulje ngritjet. Një skuadër e madhe duhet të ketë vazhdimësi, siguri dhe rendiment. Nuk jam i pari që arrij 5 fitore rresht tek Interi, që 9 vitet e fundit ka patur shumë oshilacione. Ky ekip para dy vitesh ishte në krye të Serie A në dhjetor, ndërsa u kualifikua në Champions në javën e fundit. Edhe me Mancinin bënë një nisje të mirë, por ‘kuajt e mirë’ shihen në fund të sezonit.”
RIVALITETI – “Vitin e parë që fitova titullin me Juventusin nuk u mposhtëm dhe barazuam disa ndeshje. Përballë kishim Milanin e Ibrahimovic, Thiago Silva, Robinho, Nesta dhe Gattuso. Kuqezinjtë ishin një skuadër e fortë. Ata ishin favoritë, ndërsa ne u treguam shumë të aftë atë sezon. Edhe Interi i tripletës dhe Napoli ishin më të fortë se ne. Sot nuk jemi favoritë. E kam thënë që Juventusi dhe Napoli janë një hap sipër nesh, por kjo gjë nuk duhet të ndryshojë qëndrimin tonë. Niveli i kampionatit është rritur. Lacio është një skuadër e fortë, edhe Milani. Ne duhet të luftojmë me gjithë forcat tona dhe duhet të japim gjithçka nga vetja.”
TAKTIKA – “Në futboll gjëja më e rëndësishme është ekuilibri midis fazës ofensive dhe asaj defensive. Duhet të sulmojmë me 11 vetë dhe të shfrytëzojmë hapësirat. Duhet të përmirësohemi shumë në këtë aspekt.”
SANCHEZ – “Ai është një futbollist me karakteristika të veçanta, ndërsa ne duhet t’i rikthejmë shkëlqimin që ka humbur sezonet e fundit. Sanchez është një lojtar me vlera të mëdha dhe kundër Lacios bëri mirë. Herët apo vonë do ta shihni si titullar.” /abcnews.al
